Real Madrid ត្រៀម​បន្ត​កុងត្រា​ថ្មី​ដល់ Camavinga

ក្លឹប​អធិរាជ​ស Real Madrid ត្រូវ​​បាន​​គេ​រាយការណ៍​ថា នឹង​ផ្តល់​ជូន​ខ្សែ​បម្រើ Eduardo Camavinga នូវ​​កុងត្រា​ថ្មី​លើ​កុងត្រា​បច្ចុប្បន្ន​ដែល​គាត់​មាន។ យ៉ាង​ណា​មិញ កីឡាករ​សញ្ជាតិ​បារាំង​រូប​នេះ បាន​ចូលរួម​ជាមួយ Real Madrid ដោយ​ផ្ទេរ​ពី Rennes ក្នុង​ឆ្នាំ 2021 ជាមួយ​នឹង​តម្លៃ​ផ្ទេរ 40 លានអឺរ៉ូ។

ខ្សែបម្រើ Camavinga បាន​បង្ហាញ​ខ្លួន​ចំនួន 84 ប្រកួត ដោយ​បាន​រួមចំណែក​ស៊ុត​បញ្ចូលទី​បាន 2 គ្រាប់ និង​បញ្ជូន​បាល់​ឲ្យ​មិត្ត​រួម​ក្រុម​បាន​ចំនួន 5 ដង។ កីឡាករ​សញ្ជាតិ​បារាំង​រូបនេះ​លេង​ជា​ខ្សែបម្រើ​កណ្តាល ប៉ុន្តែ​ភាព​ប៉ិនប្រសប់​របស់​គាត់ គឺ​ជាកូនសោរ​ដ៏​សំខាន់​សម្រាប់​លោក Carlo Ancelotti នៅ​រដូវកាល​នេះ។

យើង​បាន​ឃើញ Camavinga ដើរ​តួ​ជា​​ខ្សែការពារ​ឆ្វេង ក្នុង​ជំនួប​ជាមួយ Barcelona ដែល​ពួក​គេ​ទទួល​ជ័យជម្នះ​យ៉ាង​ត្រចះត្រចង់​ក្នុង​លទ្ធផល 4-0 កាល​ពី​ថ្ងៃពុធ​កន្លង​ទៅ និង​បាន​ជួយ​ក្លឹប Real Madrid ឡើង​ទៅ​កាន់​វគ្គផ្តាច់ព្រ័ត្រ Copa del Rey ទៀត​ផង។ កីឡាករ​វ័យ 20 ឆ្នាំ​រូប​នេះ​បាន​ឈ្នះ​ពាន​រង្វាន់​ចំនួន 5 រួច​ហើយ​ក្នុង​អំឡុង​ពេល​នៅ​ជាមួយ Real Madrid ប៉ុន្មាន​រដូវកាល​មក​នេះ។

កុងត្រា​របស់​គាត់​ជាមួយ​ក្លឹប​យក្សអេស្ប៉ាញ Real Madrid នឹង​ផុត​កំណត់​នៅ​ខែ​មិថុនា ឆ្នាំ 2027។ ទោះ​បី​ជា​នៅ​សល់​រយៈពេល 4 ឆ្នាំទៀត​ក៏ដោយ យោងតាម​របាយការណ៍​ពី​លោក Fabrizio Romano បាន​អះអាង​ថា ក្លឹប Real Madrid នឹង​ផ្តល់​ជូន​កុងត្រា​ថ្មី​បន្ថែម​ទៀត​នាពេល​ឆាប់ៗ​ខាង​មុខ ដើម្បី​ធ្វើ​ឲ្យ​ប្រាកដ​ថា កីឡាករ​ឆ្នើម​រូប​នេះ​នឹង​ក្លាយ​ជា​អនាគត​ដ៏​យូរ​អង្វែង​របស់​ក្លឹប។

ប្រភព: Sportsmole