បិសាចក្រហម នឹង​លក់ Scott McTominay លុះ​ត្រា​ណា​តែ​បាន​ថ្លៃ​ផ្ទេរ​លើស​ពី 50 លានផោន

ក្លឹប​បិសាចក្រហម Manchester United ត្រូវ​បាន​គេរាយ​ការណ៍​ឲ្យ​ដឹង​ថា នឹង​បដិសេធ​មិន​លក់ Scott McTominay ក្នុង​អំឡុង​ពេល​ទីផ្សារ​ដោះដូរ​កីឡាករ​នា​រដូវក្តៅ​នេះ​ឡើយ លុះ​ត្រាណា​តែ​ពួកគេ​ទទួល​បាន​ការ​ដេញ​ថ្លៃ​យ៉ាងហោច​ណាស់ ក្នុង​រង្វង់​ទឹក​ប្រាក់​ប្រមាណ​ជា 50 លានផោន។

យ៉ាង​ណា​មិញ​អនាគត​របស់​កីឡាករ​សញ្ជាតិ​ស្កុតលែន​រូប​នេះ កំពុង​ស្ថិត​ក្នុង​ភាព​មិន​ច្បាស់លាស់ បើ​ទោះ​បី​ជា​គាត់​នៅ​មាន​កុងត្រា​ជាមួយ​ក្លឹប​បិសាចក្រហម​រហូត​ដល់​ឆ្នាំ 2025 ក៏​ដោយ។ កីឡាករ​វ័យ 26 ឆ្នាំ​រូប​នេះ មាន​ការ​ប្រកួត​ប្រជែង​ក្នុង​តំណែង​លេង​ជា​ជម្រើស​ដំបូង​របស់​ក្រុម​យ៉ាង​លំបាក ខណៈ​ដែល​គ្រូ​បង្វឹក​ភាគ​ច្រើន​ប្រើប្រាស់​ខ្សែបម្រើ​ដូចជា Casemiro, Bruno Fernandes, Christian Eriksen និង Fred ជា​ដើម។

កន្លង​មក ក្លឹប​មួយ​ចំនួន​ដែល​មាន Newcastle United និង West Ham United ធ្លាប់​ចាប់​អារម្មណ៍​លើ McTominay ដែរ ប៉ុន្តែ​ច្រក​នៃ​ការ​ចាកចេញ​ពី Old Trafford របស់​ខ្សែបម្រើ​រូប​នេះ​មិន​ដំណើរ​ការ​ឡើយ ហើយ​ធ្វើ​ឲ្យ​គាត់​បន្ត​ស្នាក់​នៅ​ក្លឹប​បច្ចុប្បន្ន​របស់​ខ្លួន​ដដែល។ រដូវកាល​នេះ McTominay បាន​បង្ហាញ​ខ្លួន​ចំនួន 35 ប្រកួត ដោយ​ស៊ុតបញ្ចូលទី​បាន 3 គ្រាប់ និង​បញ្ជូន​បាល់​ឲ្យ​មិត្ត​រួម​ក្រុម​បាន​ម្ដង។

ដោយ​ឡែក​យោងតាម​របាយការណ៍​ថ្មីៗ​នេះ​បាន​អះអាង​ថា Scott McTominay បាន​ប្រាប់​ទៅ​ក្លឹប​បិសាចក្រហម​របស់​គាត់ អំពី​ការ​ចង់​ចាកចេញ​នៅ​ចុង​បញ្ចប់​នៃរដូវកាល​នេះ ដើម្បី​ស្វែងរក​ការ​ប្រកួត​ប្រជែង​ថ្មី ដែល​ផ្ដល់​ឱកាស​ឲ្យ​គាត់​បង្ហាញ​សមត្ថភាព​លើ​ទីលាន​ប្រកួត​បាន​ទៀតទាត់​ជាង​មុន។ យ៉ាង​ណា​ក៏ដោយ ក៏​មាន​ការ​លើក​ឡើង​ផង​ដែរ​ថា លោក Erik ten Hag ដែល​ជា​គ្រូបង្វឹក​របស់​ក្លឹប មិន​ចង់​លក់​ខ្សែបម្រើ​រូប​នេះ​នោះ​ទេ។

យោងតាម​គេហទំព័រ The Sun បាន​ឲ្យ​ដឹង​ថា ក្លឹប​ម្ចាស់​ជើង​ឯក​របស់​អង់គ្លេស 20 សម័យ នឹង​មិន​អនុញ្ញាត​ឲ្យ McTominay ចាក​ចេញ​នៅ​ក្នុង​នា​រដូវក្ដៅ​ខាង​មុខ​នេះ​ទេ លុះ​ត្រាតែ​ពួកគេ​ទទួល​បាន​​តម្លៃ​ទិញ​ផ្ដាច់កុងត្រា​របស់​គាត់ យ៉ាង​ហោច​ណាស់ 50 លានផោន។

ប្រភព: Sportsmole