De Gea កំពុង​មាន​ភាគរយ​ខ្ពស់​ក្នុង​ការ​ចាកចេញ​ពី​បិសាចក្រហម ខណៈ​ដែល​គាត់​មិន​ព្រម​ទទួល​យក​ការ​កាត់​ប្រាក់​ខែ​តាម​សំណើរ​របស់​ក្លឹប

អ្នក​ចាំទី​ឆ្នើម David de Gea របស់​ក្លឹប​បិសាចក្រហម Manchester United ត្រូវ​បាន​គេ​រាយ​ការណ៍​មក​ថា បាន​ច្រានចោល​ការ​ស្នើរ​សុំ​ពី​សំណាក់​ក្លឹប​របស់​ខ្លួន ក្នុង​ការ​កាត់​បន្ថយ​ប្រាក់ខែ​របស់​គាត់​ចំនួន 9 លានផោន​ក្នុង​មួយ​ឆ្នាំ ដែល​ចាប់​ផ្ដើម​អនុវត្តន៍​នៅ​លើ​កិច្ច​ព្រមព្រៀង​កុងត្រា​ថ្មី​មួយ។

កីឡាករ​វ័យ 32 ឆ្នាំ​រូបនេះ​នៅ​តែ​ប៉ុន្មាន​ខែ​ទៀត​ប៉ុណ្ណោះ នឹង​ផុតកុងត្រា​របស់​គាត់​នៅ Old Trafford ហើយ។ ចុង​បញ្ចប់​នៃ​រដូវកាល​នេះ David de Gea អាច​ចាក​ចេញ​ក្នុង​នាម​ជា​កីឡាករ​ដែល​គ្មាន​តម្លៃ​ខ្លួន ប្រសិន​បើ​ការ​ចរចា​កុងត្រា​ថ្មី​ជាមួយ​បិសាចក្រហម​មិន​អាច​ត្រូវរូវ​គ្នា​បាន​ទាន់​ពេល​វេលា​ទេ​នោះ។

កន្លង​មក De Gea ធ្លាប់​ត្រូវ​បាន​​គេ​ដឹង​ថា ចង់​​ត្រឡប់​ទៅ​ប្រទេស​អេស្ប៉ាញ​ដែល​ជា​ទឹកដី​កំណើត​របស់​ខ្លួន​វិញ ជា​ពិសេស​នៅ​ពេល​ដែល​គាត់​ធ្លាក់​ទម្រង់​លេង និង​ទទួល​បាន​ការ​រិះ​គន់​ពី​អ្នកគាំទ្រ។ ទោះ​បី​ជា​យ៉ាង​ណា​ក៏ដោយ កីឡាករ​សញ្ជាតិ​អេស្ប៉ាញ​រូបនេះ ហាក់​ដូច​ជា​មាន​ទម្រង់​លេង​ល្អ​កាន់​តែ​ខ្លាំង និង​កំពុង​ក្លាយ​ជា​ទីពេញ​ចិត្ត​នៃ​អ្នកគាំទ្រ​របស់​ក្លឹប​ផង​ដែរ។

ក្លឹប​បិសាចក្រហម​កំពុង​ព្យាយាម​ដាក់​សំណើរ​លើ​កុងត្រា​ថ្មី​ជាមួយ De Gea ជាមួយ​នឹង​ប្រាក់​ពលកម្ម​តិច​ជាង​មុន។ បច្ចុប្បន្ន​គាត់​ជា​កីឡាករ​ម្នាក់​ដែល​មាន​ប្រាក់​ខែ​ខ្ពស់​ចំនួន 375,000 ផោន ក្នុង​មួយ​សប្តាហ៍។ យោងតាម​គេហទំព័រ The Sun បាន​ឲ្យ​ដឹង​ថា ក្លឹប​ម្ចាស់​ជើង​ឯក​អង់គ្លេស 20 សម័យ​មួយ​នេះ​បាន​ស្នើ​កាត់​បន្ថយប្រាក់​ពលកម្ម​ប្រចាំ​សប្តាហ៍​របស់ De Gea មក​ត្រឹម 200,000 ផោន ក្នុង​មួយ​សប្ដាហ៍ ដែល​ជា​ការ​កាត់​បន្ថយ​ប្រាក់​ចំណូល​ប្រចាំ​ឆ្នាំ​របស់​គាត់​រហូត​ដល់ 9 លានផោន។

ប្រភព: Sportsmole