មុន​ប៉ះ​គ្នា​រំលង​អាធ្រាត​នេះ Simon Kjær បោះ​ពាក្យ​ថា គាត់​បាន​ត្រៀម​ខ្លួន​បិទ Osimhen រួច​រាល់​ហើយ

ខ្សែ​ការពារ​កណ្ដាល Simon Kjær របស់​ក្លឹប AC Milan បាន​ប្រាប់​ខ្សែ​ប្រយុទ្ធ Napoli ថា ពួក​គេ​បាន​ត្រៀម​ខ្លួន​រួច​ជា​ស្រេច​ក្នុង​ការ​ទប់​ទល់​មិន​ឲ្យ Osimhen ស៊ុត​បញ្ចូល​ទី​បាន នៅ​ពេល​ដែល​ពួក​គេ​ជួប​គ្នា​ក្នុង​ការ​ប្រកួត​ជើងទី 2 នៃ​ក្របខ័ណ្ឌ UEFA Champions League វគ្គ 8 ក្រុម​ចុង​ក្រោយ។

យ៉ាង​ណា​មិញ​រវាង AC Milan និង Napoli ត្រូវ​មាន​ក្រុម​មួយ​ដែល​នឹង​ធ្លាក់​ក្នុង​ការ​ប្រកួត​រំលង​អាធ្រាត​នេះ ខណៈ​ដែល​កាល​ពី​ប្រកួត​ជើង​ទី​មួយ AC Milan បាន​យក​ឈ្នះ Napoli 1-0។ ដូច្នេះ Napoli បាន​ជំពាក់​គ្រាប់​បាល់​គូ​ប្រកួត​របស់​ខ្លួន 1 គ្រាប់។ ប្រសិន​បើ​គេ​ចង់​ឡើង​ទៅ​វគ្គ​បន្ត​គឺ​ត្រូវ​រក​ឲ្យ​បាន​យ៉ាង​ហោច​ណាស់ 2 គ្រាប់ និង​បិទ​មិន​ឲ្យ AC Milan ស៊ុត​បញ្ចូលទី​បាន។ ការ​ប្រកួត​ជើង​ទី​ពីរ​នេះ នឹង​ធ្វើ​ឡើង​ក្នុង​ដី Napoli វិញ នៅ​ឯ​កីឡដ្ឋាន Diego Maradona ម៉ោង 2:00 រំលង​អាធ្រាត (ម៉ោង​នៅ​កម្ពុជា)។

ដោយ​ឡែក​ខ្សែការពារ​សញ្ជាតិ​ដាណឺម៉ាក Simon Kjær និង Fikayo Tomori នឹង​ត្រូវ​ទទួល​ភារ​កិច្ច​ដ៏​សំខាន់ ដើម្បី​តាម​បិទខ្សែ​ប្រយុទ្ធ​ឆ្នើម Osimhen ដែល​ជា​តារា​ឆ្នើម​មួយ​រូប​នៅ Serie A។ មុន​ការ​ប្រកួត​មក​ដល់ Simon Kjær បាន​ប្រាប់​ទៅ​កាន់ Sempremilan ថា៖ “យើង​នឹង​មិន​មាន​ការ​ផ្លាស់ប្តូរ​ច្រើន​ទេ។ Osimhen គឺ​ជា​​កីឡាករ​ដែល​មាន​គុណភាព​ល្អ រហ័សរហួន និង​កាយសម្បទា​រឹងមាំ។ គាត់​កំពុង​រីករាយ​ជាមួយ​នឹង​រដូវកាល​ដ៏​អស្ចារ្យ​របស់​ខ្លួន។ យើង​​បាន​ត្រៀម​ខ្លួន​រួច​ជា​ស្រេច​សម្រាប់​ទប់ទល់​គាត់ ប៉ុន្តែ​ទម្រង់​លេង​​នៅ​តែ​ដដែល, យើង​ទាំង​អស់​គ្នា​ការពារ ហើយ​ព្យាយាម​វាយ​បក​ទៅ​វិញ”។

ប្រភព: Dailypost NG