ព្រួញ​មួយ​បាញ់​បាន​សត្វ​ពីរ!!! Rodrygo ធ្វើ​ស្ទាយ​អបអរ​គ្រាប់​បាល់​តាម Cristiano Ronaldo ព្រោះ​ហេតុផល​សំខាន់ 2 មិន​នឹក​ស្មាន​ដល់

តារា​ឆ្នើម​​វ័យ​ក្មេង​របស់​ក្លឹប Real Madrid គឺកីឡាករ Rodrygo បាន​អបអរ​គ្រាប់​បាល់​របស់​ខ្លួន​តាម​ស្ទាយ​ដូច Cristiano Ronaldo បន្ទាប់​ពី​ខ្លួន​បាន​ស៊ុត​បញ្ចូលទី​នៅ​ក្នុង​ការ​ប្រកួត UEFA Champions League ជើង​ទី 2 ទៅ​លើ​តោខៀវ Chelsea កាល​ពី​រំលង​អាធ្រាត​យប់​មិញ​នេះ។

Rodrygo គឺ​ជា​តួឯក​នៅ​ក្នុង​ការ​ប្រកួត​នោះ ដោយ​គាត់​បាន​ស៊ុត​បាល់​បញ្ចូល​ទី 2 គ្រាប់​ម្នាក់​ឯង ដែល​ជួយ​ឲ្យ​ក្លឹប​របស់​ខ្លួន Real Madrid ទទួល​បាន​ជ័យជម្នះ 2-0 នៅ​ក្នុង​ដី Stamford Bridge របស់​តោខៀវ Chelsea និង​នាំ​ក្រុម​របស់​ខ្លួន​ឲ្យ​ឡើង​ទៅ​កាន់​វគ្គ​ពាក់កណ្តាល​ផ្តាច់ព្រ័ត្រ​ផង​ដែរ។

នៅ​ពេល​ស៊ុត​បញ្ចូលទី​គ្រាប់​បាល់​បើក​ឆាក​ដំបូង​នៅ​នាទីទី 58 កីឡាករ​សញ្ជាតិ​ប្រេស៊ីល Rodrygo បាន​ធ្វើ​ការ​អប​អរ​គ្រាប់​បាល់​ជា​ស្ទាយ Suiii ដែល​ជា​ស្ទាយ​ប្រចាំ​ត្រកូល​របស់​កីឡាករ​ឆ្នើម Cristiano Ronaldo។ Rodrygo បាន​លោត និង​បង្វិល​ខ្លួន​តាម​អ្វី​ដែល​ខ្សែ​ប្រយុទ្ធ​សញ្ជាតិ​ព័រទុយហ្គាល់​តែងតែ​ធ្វើ។

ទោះ​ជា​យ៉ាង​ណា​ក៏​ដោយ ក្រោយ​ចប់​ការ​ប្រកួត កីឡាករ​វ័យ​ក្មេង​រូបនេះ​បាន​ប្រាប់​ទៅ​កាន់ Movistar ដោយ​សារ​ភាព​ថា គាត់​បាន​ធ្វើ​វា​បែប​នេះ គឺ​ដើម្បី​កុំ​ឲ្យ​របួស​ជង្គង់​របស់​គាត់​ដែល​ធ្លាប់​មាន​បញ្ហា​រើ​ឡើង​ម្ដង​ទៀត និង​ជា​ពិសេស​ដែរ​នោះ គឺ​ដើម្បី​ជា​ការ​កោត​សរសើរ​ដល់​អតីត​វីរបុរស​របស់​ក្លឹប Cristiano Ronaldo ដែល​ជា​កីឡាករ​ស៊ុត​បញ្ចូលទី​ច្រើន​ជាង​គេ​នៅ UEFA Champions League (140 គ្រាប់)។

ប្រភព: LiveScore