Aston Villa ចាប់​អារម្មណ៍​ចង់​ចុះ​ហត្ថលេខា​លើ Smith Rowe

ក្លឹប Aston Villa ត្រូវ​បាន​គេ​រាយការណ៍​ថា អាច​នឹង​ព្យាយាម​ជា​ថ្មី​ម្តងទៀត ក្នុងការ​ចរចា​ដើម្បី​ចុះ​ហត្ថលេខា​លើ​ខ្សែ​ប្រយុទ្ធ​ស្លាប Emile Smith Rowe របស់ Arsenal នៅ​ក្នុង​អំឡុង​ទីផ្សារ​ដោះដូរ​កីឡាករ​នា​រដូវក្ដៅ​ខាង​មុខ។ យ៉ាងណា​មិញ កីឡាករ​វ័យ 22 ឆ្នាំ​រូប​នេះ ធ្លាប់​ទទួល​បាន​ការ​ចាប់​អារម្មណ៍​យ៉ាង​ខ្លាំង​ពី Aston Villa កាល​ពី​ឆ្នាំ 2021 ហើយ Arsenal ត្រូវ​បាន​គេ​ដឹង​ថា បាន​បដិសេធ​ការ​ដេញ​ថ្លៃ 30 លានផោន សម្រាប់​កីឡាករ​សញ្ជាតិ​អង់គ្លេស​រូប​នេះ។

បន្ទាប់​ពី​ការ​បរាជ័យ​របស់ Aston Villa បាន​ធ្វើ​ឲ្យ Smith Rowe បន្ត​អាជីព​របស់​ខ្លួន​នៅ Emirates ដ៏​ជោគជ័យដោយ​មាន​ទម្រង់​លេង​យ៉ាង​លេចធ្លោរ ជាមួយ​នឹង​ការ​ស៊ុត​បញ្ចូលទី 10 គ្រាប់ ក្នុង​ក្របខ័ណ្ឌ Premier League សម្រាប់​រដូវកាល​ឆ្នាំ 2021-2022 ដោយ​ពេល​នោះ​មាន​តែ Bukayo Saka ប៉ុណ្ណោះ​ដែល​ស៊ុតបញ្ចូល​ទី​ច្រើន​ជាង​គាត់ (11 គ្រាប់) សម្រាប់ក្លឹប​កាំភ្លើងធំ។

ទោះ​ជា​យ៉ាង​ណា​ក៏ដោយ របួស​ក្រលៀន​ដ៏​ធ្ងន់ធ្ងរ បាន​រារាំង Smith Rowe សម្រាប់​ការ​បង្ហាញ​សមត្ថភាព​នៅ​រដូវកាល​នេះ ហើយ​ត្រូវ​បាន​គ្រូ​បង្វឹក​ប្រើប្រាស់ Gabriel Martinelli នៅ​តំបន់​ប្រយុទ្ធ​ស្លាបឆ្វេង​ជំនួស​វិញ។ កាល​ពី​ពីរ​ឆ្នាំ​មុន Arsenal បាន​ចុះ​កុងត្រា​ថ្មីជា​មួយ Smith Rowe ដែល​មាន​សុពលភាព​រហូត​ដល់​ឆ្នាំ 2026 ប៉ុន្តែ​អនាគត​កីឡាករ​រូប​នេះ​ជាមួយ​ក្រុម​របស់​លោក Mikel Arteta ហាក់​ដូច​ជា​មិន​មាន​ភាព​ច្បាស់​លាស់​ឡើយ ខណៈ​ដែល​បច្ចុប្បន្ន Arsenal អាច​លេង​បាន​យ៉ាង​ល្អ​ដោយ​មិន​ពឹង​ផ្អែក​លើ Smith Rowe ឡើយ។

យោងតាម​គេហទំព័រ talkSPORT បាន​ឲ្យ​ដឹង​ថា Aston Villa បាន​ត្រៀម​ខ្លួន​រួច​ជា​ស្រេច ក្នុង​ផ្ទេរ Smith Rowe នៅ​ចុង​បញ្ចប់​នៃ​រដូវកាល​នេះ ដោយ​គ្រូ​បង្វឹក​របស់​ពួកគេ​លោក Unai Emery ជា​អ្នក​ចង្អុល​បង្ហាញ​អំពី​រឿង​នេះ។ Unai Emery ធ្លាប់​ជា​គ្រូ​បង្វឹក​របស់ Arsenal ពេល​ដែល Smith Rowe បាន​បង្ហាញ​ខ្លួន​ជា​លើក​ដំបូង​ក្នុង​រដូវកាល 2018-2019។

ប្រភព: Sportsmole