ក្លឹប​ធំៗ 3 នៅ​អ៊ីតាលី កំពុង​ចាប់​អារម្មណ៍​ក្នុង​ការ​ចុះ​ហត្ថលេខា​លើ Harry Maguire

ក្លឹប​សេះ​បង្កង់ Juventus, AC Milan និង Inter Milan ត្រូវ​បាន​គេ​រាយការណ៍​ថា កំពុង​ចង់​ធ្វើ​ការ​ចុះ​ហត្ថលេខា​លើ​ប្រធាន​ក្រុម​របស់​ក្លឹប​បិសាចក្រហម Manchester United គឺ​កីឡាករ Harry Maguire នៅ​ក្នុង​អំឡុង​ពេល​ទីផ្សារ​ដោះដូរ​កីឡាករ​បើក​ឡើង​វិញ​នា​រដូវក្តៅ​ខាង​មុខ។

យ៉ាង​ណា​មិញ កីឡាករ​វ័យ 30 ឆ្នាំ​រូប​នេះ បច្ចុប្បន្ន​កំពុង​ត្រូវ​បាន​អ្នក​គាំទ្រ​រិះគន់​ជា​ខ្លាំង​ជាមួយ​នឹង​ទម្រង់​លេង​ធ្លាក់​ចុះ​ខ្លាំង និង​ហាក់​ដូច​ជា​មិន​មែន​ជា​ផ្នែក​មួយ​ដ៏​សំខាន់​របស់​ក្រុម​បន្ត​ទៀត​ឡើយ។ ខ្សែការពារ​កណ្ដាល Harry Maguire បាន​បង្ហាញ​ខ្លួន 28 ប្រកួត សម្រាប់​យុទ្ធនាការ​រដូវកាល 2022-2023 នេះ។ ខ្សែការពារ​សញ្ជាតិ​អង់គ្លេស​រូប​នេះ​គ្រាន់​តែ​ជា​ជម្រើស​បន្ទាប់​ពី Lisandro Martinez និង Raphael Varane ប៉ុន្តែ​បច្ចុប្បន្ន​គេ​ទាំង 2 បាន​រងរបួស ហើយ​គ្រូ​បង្វឹក​ត្រូវ​បង្ខំ​ចិត្ត​ប្រើប្រាស់ Harry Maguire។

យោងតាម​របាយការណ៍​ពី 90min បាន​ឲ្យ​ដឹង​ថា ក្លឹប​ធំៗ​មួយ​ចំនួន​របស់​អ៊ីតាលី កំពុង​ត្រៀម​ចរចា​ចុះហត្ថលេខា​ផ្ទេរ Harry Maguire នៅ​ចុង​បញ្ចប់​នៃ​រដូវកាល​នេះ។ របាយការណ៍​ដដែល​នេះ​ដែរ​បាន​អះអាង​ថា Juventus, AC Milan និង Inter Milan សុទ្ធ​តែ​ជា​ក្លឹប​ដែល​បាន​ចាប់​អារម្មណ៍​លើ​ខ្សែការពារ​វ័យ 30 ឆ្នាំ​រូប​នេះ ដោយ​ពួក​គេ​ចង់​ដាក់​សំណើរ​ក្នុង​លក្ខខណ្ឌ​ខ្ចី​ជើង​គេ​នៅ​មុន​រដូវកាល​ឆ្នាំ 2023-2024។

ប្រភព: Sportsmole