អតីត​ក្លឹប​ចាស់​មួយ កំពុង​ដាក់​ដំណើរ​នាំ​យក Cristiano Ronaldo ចេញ​ពី​ទឹកដី​អារ៉ាប៊ី​សាអូឌីត

តារា​ឆ្នើម Cristiano Ronaldo ដែល​បច្ចុប្បន្ន​កំពុង​ប្រកប​អាជីព​ជាមួយ​ក្លឹប Al-Nassr ពេល​នេះ​ត្រូវ​បាន​អតីត​ក្លឹប​ចាស់​របស់​ខ្លួន Sporting Lisbon ចង់​នាំ​យក​គាត់​ត្រឡប់​មក​វិញ។ ថ្មីៗ​នេះ​មាន​សេចក្ដី​រាយការណ៍​មួយ​បាន​អះអាងថា Sporting Lisbon បាន​ដាក់​សំណើរ​ដើម្បី​ចុះ​ហត្ថលេខា​លើ​កីឡាករ​វ័យ 38 ឆ្នាំ​រូបនេះ។

អ្នកគាំទ្រ​ជា​ច្រើន​របស់ Cristiano Ronaldo កំពុង​មិន​ពេញ​ចិត្ត​ជា​មួយ​នឹង​ក្លឹប​បច្ចុប្បន្ន​របស់​គាត់ និង​ចង់​ឃើញ​កីឡាករ​ឆ្នើម​រូប​នេះ​ស្ថិត​នៅ​ក្នុង​កម្រិត​នៃ​ការ​ប្រកួត​ប្រជែង​ពាន​រង្វាន់​ធំៗ​ក្នុង​តំបន់​អឺរ៉ុប​វិញ។ ដូចគ្នា​នេះ​ដែរ កាល​ពី​ប៉ុន្មាន​ថ្ងៃ​មុន Cristiano Ronaldo បាន​ប្រើកាយវិការ​មិន​សមរម្យ​ទៅ​កាន់​អ្នក​គាំទ្រ Al-Hilal ដែល​ជា​គូ​ប្រជែង បន្ទាប់​ពី​ពួក​គេ​បាន​​ជេរ​គាត់​ស្ទើរ​ពេញ​មួយ​​ប្រកួត។

អ្នក​គាំទ្រ​​របស់ Al-Hilal បាន​​ស្រែក​ហ៊ោ និង​ចំអក​ឲ្យ​ ​Cristiano Ronaldo ខណៈ​ក្រុម Al-Nassr របស់​គាត់​ក៏​បាន​​ចាញ់​ក្នុង​លទ្ធផល 2-0 ថែម​ទៀត​ផង។ ពួក​គេ​បាន​ស្រែក​ហៅ​ឈ្មោះ Lionel Messi ពេល​ដែល Cristiano Ronaldo ដើរ​ចេញ​ពី​ទីលាន​ប្រកួត។ យ៉ាង​ណា​ម្ចាស់​ពាន Ballon d’Or 5 សម័យ​កាល​រូប​នេះ បាន​យក​ដៃ​ចាប់​ប្រដាប់​ភេទ​របស់​គាត់ ដើម្បី​ឌឺដង​ទៅ​កាន់​ពួក​គេ​ទាំង​នោះ​វិញ។

តាំង​ពី​ពេល​នោះ​មក មាន​ការ​អំពាវនាវ​ឲ្យ Cristiano Ronaldo ចាកចេញ​ពី​ទឹកដី​អារ៉ាប់ ខណៈ​​ដែល​មេធាវី​មួយ​រូប​ក៏​បាន​ដាក់​​ញត្តិ​ទៅ​អាជ្ញាធរ​អំពី​រឿង​នេះ​ដែរ។ យ៉ាង​ណា​មិញ​ពេល​នេះ El Nacional បាន​រាយការណ៍ថា តារា​ឆ្នើម​របស់​ព័រទុយហ្គាល់​​រូប​នេះ​មិន​សប្បាយ​ចិត្ត​នឹង​ជីវិត​នៅ Al-Nassr ឡើយ ហើយ​ចង់​ចាកចេញ​នៅ​ចុង​បញ្ចប់​នៃ​រដូវកាល​នេះ។ ក្លឹប Sporting CP ត្រូវ​​បាន​​គេ​អះអាង​ថា បាន​ដាក់​សំណើរនាំ​យក​អតីត​កីឡាករ​របស់​ខ្លួន​រូប​នេះ​ត្រឡប់​ទៅ​វិញ។

គួរ​ដឹង​ផង​ដែរ​ថា Cristiano Ronaldo គឺ​ជា​កីឡាករ​ដែល​ប្រសូត្រ​ចេញ​ពី​ថ្នាល​យុវជន Sporting ដែល​លេង​ក្នុង​អំឡុង​ឆ្នាំ 1997 ហើយ​បាន​បង្ហាញ​ខ្លួន 31 ប្រកួត មុន​ពេល​ចាកចេញ​ទៅ Manchester United ក្នុង​ខែ​សីហា ឆ្នាំ 2003។

ប្រភព: Dailypost