Arsenal កំពុង​បារម្ភ​ខ្លាំង ដោយ​ខ្សែការពារ William Saliba អាច​នឹង​ត្រូវ​អវត្តមាន​រហូត​ដល់​ចប់​រដូវកាល

ខ្សែ​ការពារ​កណ្ដាល William Saliba របស់​ក្លឹប​កាំភ្លើងធំ Arsenal នឹង​ត្រូវ​អវត្តមាន​​សម្រាប់ការ​ប្រកួត​​ជាមួយ​ក្រុម​ដែល​តាម​ដណ្ដើម​តំណែង​កំពូល​តារាង Manchester City នៅ​ថ្ងៃ​ព្រហស្បត្តិ៍​សប្ដាហ៍​នេះ។ យ៉ាង​ណា អ្វី​ដែល​កាន់​តែ​ភ័យ​ខ្លាច​ជាង​នេះ​ទៀត​នោះ គឺ​គាត់​អាច​នឹង​ត្រូវ​អវត្តមាន​សម្រាប់​ការ​ប្រកួត​ដែល​នៅ​សល់​ទាំង​អស់​រហូត​ដល់​ចប់​រដូវកាល។

អាច​និយាយ​បាន​ថា ឆ្នាំ​នេះ​គឺ​ជា​ឆ្នាំ​ដ៏ជោគជ័យ​របស់​ខ្សែការពារ​សញ្ជាតិ​បារាំង William Saliba ជាមួយ​នឹង​ការ​បង្ហាញ​ទម្រង់​លេង​បាន​យ៉ាង​លេច​ធ្លោរ ហើយ​ជា​ជម្រើស​ដ៏​សំខាន់​របស់​ក្រុម និង​បាន​ក្លាយ​ជា​ផ្នែក​មួយ​ដ៏​សំខាន់​ក្នុង​ការ​ជួយ Arsenal ឲ្យ​ឈរ​នៅ​កំពូល​តារាង Premier League។

ស្រប​ពេល​ជាមួយ​គ្នា​នោះ រឿង​អកុសល​បាន​កើត​ឡើង ដោយ​គាត់​បាន​រង​របួស​ខ្នង ក្នុង​ការ​ប្រកួត​ជើង​ទី 2 នៃ​ពានរង្វាន់ Europa League វគ្គ 16 ក្រុម​ចុង​ក្រោយទល់​នឹង Sporting Lisbon កាល​ពី​ខែ​មុន។ ជា​លទ្ធផល​ខ្សែការពារ​ឆ្នើម​រូប​នេះ​ត្រូវ​សម្រាក​ព្យាបាល​របួស ហើយ​គ្រូ​បង្វឹក​ក៏​ត្រូវ​បង្ខំ​ចិត្ត​ប្រើប្រាស់ Rob Holding ដើម្បី​ចាប់​ដៃ​គូ​គ្នា​ជាមួយ Gabriel Magalhaes។

ដំបូង​ឡើយ គ្រូ​បង្វឹក​លោក Mikel Arteta បាន​អះអាង​ថា Saliba នឹង​ចំណាយ​ពេល​ព្យាបាល​របួស​ពីរ​បី​សប្តាហ៍​ប៉ុណ្ណោះ ហើយ​អាច​វិល​ត្រឡប់​ចូល​ទីលាន​វិញ​បាន។ ប៉ុន្តែ​​ថ្ងៃ​នេះ​របាយការណ៍​ពី The Athletic បាន​រាយការណ៍​ថា គាត់​ពិត​ជា​នឹង​ត្រូវ​បង្ខំ​ឲ្យ​ខកខាន​ការ​ប្រកួត​ជាមួយ​នឹង Manchester City នៅ​ថ្ងៃ​ខាន​ស្អែក​នេះ។ ក្លឹប​កាំភ្លើងធំ​ត្រូវ​បាន​គេដឹង​ថា កំពុង​មាន​ការ​ព្រួយ​បារម្ភ​កាន់​តែ​ខ្លាំង​ថា Saliba នឹង​មិន​អាច​ចូល​លេង​រហូត​ដល់​ចប់​រដូវកាល​នេះ ប៉ុន្តែ​គ្រប់​យ៉ាង​មិន​ទាន់​បាន​បញ្ជាក់​ច្បាស់លាស់​នោះ​ឡើយ។

ប្រភព: Sportsmole