Lionel Messi នឹង​បន្ត​នៅ PSG រដូវ​កាល​ក្រោយ ដោយ​មិន​ត្រឡប់​មក Barcelona នោះ​ឡើយ

យោងតាម​របាយការណ៍​មួយ​បាន​ឲ្យ​ដឹងថា ខ្សែ​ប្រយុទ្ធ​ឆ្នើម Lionel Messi នឹង​បន្ត​នៅ Paris Saint-Germain រដូវកាល​ក្រោយ​បន្ត​ទៀត បើ​ទោះបី​ជា​មាន​ការ​រំពឹង​ទុក​ថា កីឡាករ​អាហ្សង់ទីន​រូប​នេះអាច​នឹង​ត្រឡប់ទៅ Barcelona វិញ​ក៏​ដោយ។

កីឡាករ​វ័យ 34 ឆ្នាំ​រូបនេះ​បាន​ចូលរួម​ជាមួយ PSG កាល​ពី​រដូវ​ក្តៅ​មុន ដោយ​ត្រូវ​បាន​បង្ខំ​ឲ្យ​ចាកចេញ​ពី​ទឹកដី Camp Nou ដែល​ជា​កន្លែង​ដែល​គាត់​ស្រឡាញ់​បំផុត ដោយសារ​តែ​ស្ថានភាព​ហិរញ្ញវត្ថុ​ដ៏​លំបាក​របស់​ក្លឹប Barcelona ហើយ​ទើបតែ​ចាប់ផ្តើម​បាន​ធូរស្រាល​នា​ពេល​ថ្មីៗ​នេះ​ប៉ុណ្ណោះ។

Messi ត្រូវ​បាន​គេ​រំពឹង​ថា នឹង​លើកពាន Ligue 1 នៅ​រដូវកាល​នេះ ប៉ុន្តែ​ចាប់តាំង​ពី​ផ្លាស់​ទៅ​ប្រទេស​បារាំង​មក គាត់​មិន​បាន​បង្ហាញ​សមត្ថភាព​ដល់​កម្រិត​ដែល​គាត់​ធ្លាប់​បាន​ធ្វើ​នៅ​កំឡុង​ពេល​ដែល​គាត់​លេង​នៅ Barcelona នោះ​ឡើយ ដោយ​ស៊ុតបញ្ចូលទី​បាន​ត្រឹមតែ 8 គ្រាប់​ប៉ុណ្ណោះ នៅ​ក្នុង​ការ​ប្រកួត​ទាំងអស់​របស់​ក្លឹប បើ​ទោះបី​ជា​គាត់មាន 13 Assists ក៏ដោយ។

អតីត​មិត្ត​រួមក្រុម​របស់​គាត់ និង​សូម្បី​តែ​ប្រធាន​ក្លឹប Joan Laporta ក៏​បាន​និយាយ​អំពី​ការ​ដែល​ចង់​នាំ​យក Lionel Messi ​ត្រឡប់​ទៅកាន់ក្លឹប Barcelona វិញ​ដែរ ដែល​វា​ជា​កន្លែង​ដែល Messi បាន​ចំណាយ​ពេល 17 ឆ្នាំ ដើម្បី​ឈ្នះ​ពានស្ទើរ​គ្រប់​បែប​យ៉ាង។

ទោះ​ជា​យ៉ាងណា​ក៏ដោយ ក្រោយ​មក​ទៀត​លោក Laporta បាន​ផ្លាស់​ប្តូរ​គំនិត​របស់​គាត់ ហើយ​ឥឡូវ​នេះ កាសែត​ផ្លូវការណ៍ Mundo Deportivo ក៏​បាន​សរសេរ​ថា Lionel Messi នឹង​បន្ត​នៅ​ប្រទេស​បារាំង​មួយ​រដូវកាល​ទៀត។

ប្រភព: 90 Min