Barcelona ត្រៀម​ចុះ​ហត្ថលេខា​លើ​ខ្សែបម្រើ​វ័យ 20 ឆ្នាំ​មួយ​រូប ដែល​លេង​នៅ​លីគ​កំពូល​នៃ​ប្រទេស​អ៊ុយរូហ្គាយ

ក្លឹប​អ្នក​មាន​បុណ្យ Barcelona ត្រូវ​បាន​គេ​រាយការណ៍​ថា បាន​ឈាន​ដល់​កិច្ច​ព្រមព្រៀង​ជាមួយ​ក្លឹប Liverpool Futbol ដែល​ស្ថិត​នៅ​លីគ​កំពូល​នៃ​ប្រទេស​អ៊ុយរូហ្គាយ​ហើយ សម្រាប់​ការ​ចុះ​ហត្ថលេខា​លើ​ខ្សែបម្រើ Fabricio Diaz។ ក្លឹប​យក្ស​កាតាឡាន់​ត្រូវ​បាន​គេ​ដឹង​ថា បាន​តាម​ប្រមាញ់​កីឡាករ​វ័យ 20 ឆ្នាំ​រូប​នេះ ចាប់​តាំង​ពី​គាត់​បាន​បង្ហាញ​ខ្លួន​ជា​លើក​ដំបូងជាមួយ​ក្រុម​ឈុត​ធំ ក្នុង​ខែ​កុម្ភៈ ឆ្នាំ 2020 មក​ម្ល៉េះ។

ខ្សែ​បម្រើ Fabricio Diaz ដែល​បច្ចុប្បន្ន​កំពុង​មាន​ភាព​លេច​ធ្លោរ​ខ្លាំង​នៅ Primera Division បាន​បង្ហាញ​ខ្លួន​សរុប​ចំនួន 116 ប្រកួត នៅ​គ្រប់​ការ​ព្រឹត្តិការណ៍​នៃ​ការ​ប្រកួត​ប្រជែង​​ទាំង​អស់​របស់​ក្លឹប Liverpool Futbol និង​បាន​ស៊ុត​បញ្ចូលទី​សរុប 5 គ្រាប់ ហើយ​បញ្ជូន​បាល់​ឲ្យ​មិត្ត​រួម​ក្រុម​បាន​ចំនួន 7 ដង។

កីឡាករ​ដ៏​មាន​ទេពកោសល្យ​រូប​នេះ គឺជា​កាពីតែន​ក្រុម​អាយុ​ក្រោម 20 ឆ្នាំ (U-20) របស់​អ៊ុយរូហ្គាយ នៅ​ក្នុង​ការ​ប្រកួត​ជើង​ឯក​ទ្វីប​អាមេរិក​ខាងត្បូង​កាល​ពី​ដើម​ឆ្នាំ​នេះ ដោយ​បាន​បង្ហាញខ្លួន​ចំនួន 8 ប្រកួត ខណៈ​ដែល​ជួយ​ក្រុម​ជម្រើស​ជាតិ​ឲ្យ​បញ្ចប់​ក្នុង​ចំណាត់​ថ្នាក់​លេខ 2 ដោយ​ចាញ់​ប្រេស៊ីល​ជា​ក្រុម​ជើង​ឯក។

Fabricio Diaz ត្រូវ​បាន​គេ​ដឹង​ថា ធ្លាប់​ទទួល​បាន​ការ​ចំណាប់​អារម្មណ៍​ពី​ក្លឹប​នៅ​ប្រទេស​ប្រេស៊ីល និង​អាហ្សង់ទីន​គឺ​ក្លឹប Flamengo និង River Plate។ ទោះ​បី​ជា​យ៉ាង​ណា​ក៏ដោយ យោង​តាម​របាយការណ៍​នៅ​ក្នុង​ប្រទេស​អេស្ប៉ាញ​បាន​ឲ្យ​ដឹង​ថា Barcelona គ្រោង​នឹង​ចុះ​ហត្ថលេខា​លើ​ខ្សែបម្រើ​រូប​នេះ​រួច​ហើយ ដោយ​ពួក​គេ​បាន​ឈាន​ដល់​កិច្ច​ព្រមព្រៀង​ជាមួយ​អ្នក​តំណាង​របស់​គាត់ និង​ក្លឹប​បច្ចុប្បន្ន Liverpool Futbol ផង​ដែរ។

ប្រភព: Sportsmole