ក្លឹប​បិសាចក្រហម Manchester United និង PSG កំពុង​ចាប់​ចិត្ត​លើ​ការ​ផ្ទេរ​ខ្សែ​ប្រយុទ្ធ Tammy Abraham

ក្លឹប​បិសាចក្រហម Manchester United និង​ក្លឹប​យក្ស​បារាំង Paris Saint-Germain ថ្មីៗ​នេះ​បាន​បញ្ជូន​អ្នក​សង្កេត​ការណ៍​របស់​ខ្លួន​ទៅ​មើល​ខ្សែប្រយុទ្ធ​ឆ្នើម Tammy Abraham ក្នុង​អំឡុង​ពេល​នៃ​ការ​ប្រកួត​រវាង​ក្លឹប AS Roma ជាមួយ AC Milan កាល​ពី​ថ្ងៃ​សៅរ៍​សប្ដាហ៍​មុន។

អតីត​កីឡាករ​ឆ្នើម​របស់​ក្លឹប​តោខៀវ Chelsea រូប​នេះ ត្រូវ​បាន​ផ្សារភ្ជាប់​ជា​យូរ​មក​ហើយ​ជាមួយ​នឹង​ការ​វិល​ត្រឡប់​មក​កាន់​ក្របខ័ណ្ឌ Premier League វិញ បន្ទាប់​ពី​គាត់​បាន​ក្លាយ​ជា​កីឡាករ​ម្នាក់​ដ៏​លេច​ធ្លោរ​នៅ​ក្នុង​លីគ​កំពូល​នៃ​ប្រទេស​អ៊ីតាលី និង​ជា​ពិសេស​ពេល​ដែល​ខ្សែ​ប្រយុទ្ធ​កណ្ដាល​រូប​នេះ បាន​ជួយ​ក្លឹប AS Roma ឲ្យ​ឈ្នះពាន Europa Conference League កាល​ពី​ឆ្នាំ​មុន។

ក្លឹប​ជា​ច្រើន​បាន​ចាប់​អារម្មណ៍​លើ Abraham ខណៈ​ដែល​កីឡាករ​សញ្ជាតិ​អង់គ្លេស​រូប​នេះ​រក​បាន​គ្រាប់បាល់ 36 គ្រាប់ និង Assist 12 ដង ក្នុង​ការ​បង្ហាញ​ខ្លួន​សរុប 98 ប្រកួត​ជាមួយ AS Roma ក្នុង​រយៈ​ពេល 2 រដូវកាល​កន្លង​មក​នេះ។ យ៉ាង​ណា​មិញ យោងតាម​កាសែត Gazzetta dello Sport បាន​អះអាង​ថា អ្នក​តំណាង​មក​ពី​ក្លឹប​បិសាចក្រហម Manchester United និង PSG បាន​តាមដាន Abraham ហើយ​ពួក​គេ​អាច​នឹង​ពិចារណា​ចរចា​ផ្ទេរ​តារា​ឆ្នើម​រូប​នេះ​ពី​ក្លឹប AS Roma នៅ​ចុង​បញ្ចប់​នៃ​រដូវកាល​នេះ។ បច្ចុប្បន្ន Abraham នៅ​ក្រោម​កុងត្រា​រយៈពេល 3 ឆ្នាំទៀត ជាមួយ AS Roma ហើយ​តម្លៃ​នៃ​ការ​ផ្ទេរ​ចេញ​ត្រូវ​បាន​គេ​ប៉ាន់​ស្មាន​ថា​ចន្លោះ​ពី 45.4 លានអឺរ៉ូ រហូត​ដល់ 75.6 លានអឺរ៉ូ។

ប្រភព: Sportsmole