Connect with us

បាល់ទាត់អន្តរជាតិ

Cristiano Ronaldo ចង់​ឲ្យ​ក្លឹប​របស់​ខ្លួន​ចុះ​ហត្ថលេខា​ផ្ទេរ Alex Telles នៅ​ចុង​បញ្ចប់​នៃ​រដូវកាល​នេះ

Published

on

អតីត​ខ្សែ​ប្រយុទ្ធ​របស់​ក្លឹប​បិសាចក្រហម Manchester United គឺ​កីឡាករ Cristiano Ronaldo ត្រូវ​បាន​គេ​រាយការណ៍​ឲ្យ​ដឹង​ថា ចង់​ជួបជុំ​គ្នា​ជាមួយ​ខ្សែការពារ​ឆ្វេង Alex Telles ដែល​ជា​អតីត​មិត្ត​រួម​ចាស់​របស់​ខ្លួន នៅ​ក្លឹប​ថ្មី Al-Nassr។ កីឡាករ​សញ្ជាតិ​ព័រទុយហ្គាល់​រូប​នេះ​ត្រូវ​បាន​គេ​ដឹង​ថា ចង់​ឲ្យ​ក្លឹប​របស់​ខ្លួន​ចុះ​ហត្ថលេខា​ផ្ទេរ Alex Telles នៅ​ចុង​បញ្ចប់​នៃ​រដូវកាល​នេះ។

ដោយ​ឡែក Alex Telles ដែល​ជា​ខ្សែការពារ​សញ្ជាតិ​ប្រេស៊ីល បាន​ផ្ទេរ​មក Old Trafford ក្នុង​ឆ្នាំ 2020 ប៉ុន្តែ​ទម្រង់​លេង​របស់​គាត់​មិន​អាច​ប្រជែង​នឹង​មិត្ត​រួម​ក្រុម​ផ្សេង​ទៀត​របស់​ក្លឹប ហើយ​ត្រូវ​បាន​បិសាចក្រហម​ដាក់​ឲ្យ​ខ្ចី​ជើង​ទៅ​ទឹកដី​អេស្ប៉ាញ​ជាមួយ Sevilla ពេញ​មួយ​រដូវកាល​ឆ្នាំ 2022-2023។

យ៉ាង​ណា​ក៏​ដោយ Alex Telles នៅ​តែ​ជា​កីឡាករ​ធម្មតា និង​មាន​ទម្រង់​លេង​មិន​សម​តាម​ការ​រំពឹង​ទុក​របស់ Sevilla ឡើយ ហើយ​រដូវកាល​នេះ​គាត់​បាន​បង្ហាញ​ខ្លួន​ចំនួន 32 ប្រកួត ដោយ​រួម​ចំណែក Assists បាន 3 ដង។ ទន្ទឹម​នឹង​នេះ​ដែរ Sevilla ត្រូវ​បាន​គេ​ដឹង​ថា នឹង​មិន​សម្រេច​ចិត្ត​ទិញ​ផ្ដាច់​កុងត្រា​របស់ Alex Telles ឡើយ ហើយ​បញ្ជូន​គាត់​ឲ្យ​ត្រឡប់​មក Manchester United វិញ ខណៈ​ដែល Marcos Acuna នៅ​តែ​ជា​ជម្រើស​ខ្សែការពារ​ស្លាប​ដ៏​សំខាន់​របស់​ពួក​គេ។

ទោះ​ជា​យ៉ាង​ណា​ក៏​ដោយ​ជាមួយ​នឹង​ជម្រើស​បច្ចុប្បន្ន​ដែល​មាន Luke Shaw និង Tyrell Malacia ក្លឹប​បិសាចក្រហម​មិន​ត្រូវ​ការ Alex Telles ឡើយ ហើយ​ពួក​គេ​កំពុង​ព្យាយាម​លក់​ខ្សែការពារ​រូប​នេះ​ចេញ នៅ​មុន​រដូវកាល​ក្រោយ​ចាប់​ផ្ដើម និង​ដើម្បី​កុំ​ឲ្យ​ខ្សែការពារ​រូប​នេះ​ចាកចេញ​នៅ​ពេល​កុងត្រា​ផុត​កំណត់​នៅ​ឆ្នាំ 2024។

យោងតាម​របាយការណ៍​ពី AS បាន​អះអាង​ថា ក្លឹប Al-Nassr កំពុង​ពិចារណា​ចង់​ចុះ​ហត្ថលេខា​លើ Alex Telles នៅ​ចុង​បញ្ចប់​នៃ​រដូវកាល​នេះ ហើយ Cristiano Ronaldo ក៏​ជា​មនុស្ស​ម្នាក់​ដែល​គាំទ្រ​គំនិត​នេះ និង​ចង់​ឲ្យ​អតីត​មិត្ត​រួម​ក្រុម​របស់​គាត់ មក​លេង​នៅ​ប្រទេស​អារ៉ាប៊ី​សា​អូឌីត​ជាមួយ​គ្នា។

ប្រភព: Sportsmole

Trending

© រក្សា​សិទ្ធិ​គ្រប់​យ៉ាង​ដោយ​ X-SPORT ឆ្នាំ​ ២០២២