Man City នឹង​ឲ្យ Bernardo Silva ទៅ Barcelona ប្រសិន​បើ​ពួក​គេ​មាន​លុយ 75 លានផោន

ក្លឹប​មេឃខៀវ Manchester City នឹង​មិន​សម្រេច​ចិត្ត​លក់​ខ្សែ​បម្រើ​ឆ្នើម Bernardo Silva ឡើយ ប៉ុន្តែ​ប្រសិន​បើ​គាត់​ទទូច​​នៅ​តែ​ចង់​ចាកចេញ​នៅ​រដូវក្តៅ​នេះ នោះ​ពួក​គេ​នឹង​អាច​អនុញ្ញាត​ឲ្យ​គាត់​ចាកចេញ​បាន ប៉ុន្តែ​ត្រូវ​ទាមទារ​នូវ​តម្លៃ​ផ្ទេរ​ដ៏​ពេញ​លេញ។ បច្ចុប្បន្ន​នេះ​មាន​ក្លឹប 2 ដែល​ចាប់​អារម្មណ៍​ខ្លាំង​លើ​ខ្សែ​បម្រើ​សញ្ជាតិ​ព័រទុយហ្គាល់​រូប​នេះ គឺ Barcelona និង PSG។

តាម​ពិត​ទៅ Bernardo Silva ចង់​ចាកចេញ​ពី​ក្លឹប​បច្ចុប្បន្ន​របស់​ខ្លួន Manchester City ដើម្បី​ចូលរួម​ជាមួយ Barcelona តាំង​ពី​រដូវក្តៅ​ឆ្នាំ​មុន​មក​ម្ល៉េះ ប៉ុន្តែ​ក្លឹប​របស់​គេ​បាន​ឈរ​ក្នុងគោល​ជំហរ​ដ៏​ម៉ឺងម៉ាត់​ដោយ​មិន​សម្រេច​ចិត្ត​លក់​គាត់​ចេញ​នៅ​ពេល​នោះ​ឡើយ។ ក្រោយ​មក​ទៀត នៅ​ខែ​មករា​ដើម​ឆ្នាំ​នេះ Barcelona ក៏​បាន​ព្យាយាម​ជា​ថ្មី​ម្ដង​ទៀត​ដើម្បី​ចរចា​ផ្ទេរ Bernardo Silva ហើយ​ក៏​នៅ​តែ​បន្ត​ការ​បរាជ័យ​ដដែល។

ទោះ​ជា​យ៉ាង​ណា​ក៏​ដោយ ក្លឹប​យក្ស​កាតាឡាន់ ត្រូវ​បាន​គេ​ដឹង​ថា នឹង​មាន​គម្រោង​ដើម្បី​ល្បួង​យក Bernardo Silva ជា​ថ្មី​ម្ដង​ទៀត​នៅ​ចុង​បញ្ចប់​នៃ​រដូវកាល​នេះ។ ដោយ​ឡែក​កន្លង​មក លោក Pep Guardiola ធ្លាប់​បាន​និយាយ​យ៉ាង​ច្បាស់​ទៅ​កាន់​កីឡាករ​ទាំង​អស់​របស់​គាត់​ថា គាត់​មិន​បង្ខំ​នរណា​ម្នាក់​ឲ្យ​ត្រូវ​តែ​នៅ​ជាមួយ​គាត់​ឡើយ ប្រសិន​បើ​ពួកគេ​មិន​មាន​បំណង​ចង់​លេង​ឲ្យ​ក្លឹប​ទេ​នោះ ទោះ​បី​ជា​ពួកគេ​ជា​នរណា​ក៏​ដោយ។

យ៉ាង​ណា​មិញ​របាយការណ៍​ចុង​ក្រោយ​មួយ​ដែល​ចេញ​ពី​ប្រភព​របស់ Man City បាន​អះអាង​ថា Bernardo Silva ពិត​ជា​នឹង​អាច​ចាកចេញ​បាន​នៅ​ចុង​រដូវកាល​នេះ ប្រសិន​បើ​គាត់​ចង់។ ប៉ុន្តែ​បច្ចុប្បន្ន គាត់​នៅ​ស្ថិតក្រោម​ច​កុងត្រា​ជាមួយ​ក្លឹប​រហូត​ដល់​ឆ្នាំ 2025 ហើយ​ក្លឹប​ណា​ដែល​ចង់​បាន​គាត់​នឹង​ត្រូវ​បង់​ថ្លៃ​​ផ្ទេរ ដែល​មាន​តម្លៃ​ប្រហែល​ជា 75 លានផោន។

ប្រភព: 90 Min