PSG ព្យួរ​ការ​ប្រកួត​របស់ Messi បណ្ដោះ​អាសន្ន ជុំវិញ​ការ​ធ្វើ​ដំណើរ​ទៅ​ប្រទេស​អារ៉ាប៊ីសាអូឌីត​ដោយ​គ្មាន​ការ​អនុញ្ញាត​ពី​ក្លឹប

ក្លឹប​យក្ស​បារាំង Paris Saint-Germain បាន​ព្យួរ​ការ​ប្រកួត​របស់ Lionel Messi រយៈ​ពេល 2 សប្តាហ៍ ដែល​មាន​ន័យ​ថា គាត់​នឹង​មិន​មាន​វត្តមាន​ក្នុង​ការ​ប្រកួត​របស់ PSG រយៈ​ពេល 14 ថ្ងៃ។ ក្លឹប​បាន​ដាក់​ពិន័យ​ចំពោះ​ខ្សែ​ប្រយុទ្ធ​សញ្ជាតិ​អាហ្សង់ទីន​រូប​នេះ បន្ទាប់​​ពីគាត់​​បាន​ធ្វើ​​ដំណើរ​ទៅ​ប្រទេស​អារ៉ាប៊ីសាអូឌីត​ដោយ​គ្មាន​ការ​អនុញ្ញាត​ពី​ក្លឹប (នេះ​បើ​យោងតាម​របាយការណ៍​ពី​លោក Fabrizio Romano)។

យ៉ាង​ណា​មិញ​បន្ទាប់​ពី​ការ​ចាញ់ 3-1 របស់ PSG ជាមួយ​ក្លឹប Lorient កីឡាករ​វ័យ 35 ឆ្នាំ​រូប​នេះ ត្រូវ​បាន​គេ​រាយការណ៍​ថា មិន​បាន​ចូលរួម​ហ្វឹកហាត់​ជាមួយ​មិត្ត​រួម​ក្រុម​ឡើយ​កាល​ពី​ថ្ងៃ​ច័ន្ទ​ដើម​សប្ដាហ៍នេះ ខណៈ​ដែល​គាត់​ត្រូវ​បាន​គេ​ដឹង​ថា ពេល​នោះ​កំពុង​ស្នាក់​នៅ​ក្នុង​ទីក្រុង​រីយ៉ាដ​នៃ​ប្រទេស​អារ៉ាប៊ីសាអូឌីត។

ដើម​ហេតុ​នៃ​រឿង​នេះ​ត្រូវ​បាន​គេ​ដឹង​ថា ដំបូង​ឡើយ​គ្រូ​បង្វឹក​របស់​ក្លឹប PSG លោក Christophe Galtier បាន​សន្យា​ជាមួយ​កីឡាករ​របស់​គាត់​ថា នឹង​អនុញ្ញាត​ឲ្យ​ពួកគេ​សម្រាក 2 ថ្ងៃ គឺ​ថ្ងៃច័ន្ទ និង​ថ្ងៃអង្គារ ប្រសិន​បើ​ពួកគេ​យក​ឈ្នះ​ការ​ប្រកួត​ជាមួយ Lorient។ ទោះ​ជា​យ៉ាង​ណា​ក៏​ដោយ Christophe Galtier បាន​បញ្ជាក់​យ៉ាង​ច្បាស់​ថា ប្រសិន​ជា​​ពួក​គេ​ចាញ់​ការ​ប្រកួត​នោះ កីឡាករ​ត្រូវ​តែ​ចូល​ហ្វឹកហាត់​វិញ​នៅ​ថ្ងៃ​ច័ន្ទ។

មុន​ការ​ប្រកួត​ជាមួយ Lorient ខ្សែ​ប្រយុទ្ធ Lionel Messi បាន​ស្នើសុំ​ធ្វើ​ដំណើរ​ទៅ​កាន់​ទឹកដី​នៃ​ប្រទេស​អារ៉ាប់ ដែល​ពាក់ព័ន្ធ​នឹង​ការងារ​ជា​ឯកអគ្គរដ្ឋទូត​របស់​ខ្លួន។ លោក Christophe Galtier និង​ប្រធាន​ផ្នែក​កីឡា​លោក Luis Campos បាន​ផ្តល់​ការ​យល់​ព្រម​ឲ្យ​គាត់​ទៅ លុះ​ត្រាតែ PSG ឈ្នះ រឺ​ស្មើ ប៉ុន្តែ​មិនមែន​ចាញ់​ទេ។ ទោះ​បី​ជា​យ៉ាង​ណា​ក៏ដោយ បន្ទាប់​ពី​ចាញ់ Lorient 3-1 តារា​ឆ្នើម Lionel Messi នៅតែ​ធ្វើ​ដំណើរ​ទៅ​ប្រទេស​អារ៉ាប៊ីសាអូឌីត ដោយ​មិន​បាន​សុំ​ការ​អនុញ្ញាត​ម្តង​ទៀត​ឡើយ ហើយ​ក៏​បាន​អាក់ខាន​ក្នុង​ការ​វិល​ចូល​ហ្វឹកហាត់​តាម​ការ​កំណត់​របស់​ក្លឹប​ផង​ដែរ។

ប្រភព: Dailypost NG