អតីត​វីរបុរស​មួយ​រូប​របស់​ក្លឹប Man City ថា លោក Pep មិន​អាច​ឈ្នះពាន 3 ក្នុង​រដូវកាល​នេះ​ទេ ជា​ពិសេស​ពាន UCL

អតីត​ខ្សែ​ការពារ​របស់​ក្លឹប​មេឃខៀវ Manchester City លោក Micah Richards បាន​និយាយ​ថា គាត់​មិន​រំពឹង​ថា​ក្រុម​របស់​លោក Pep Guardiola នឹង​អាច​ឈ្នះពាន 3 ក្នុង​រដូវកាល​នេះ​ទេ។ លើស​ពី​នេះ​ទៀត Richards បាន​សង្កត់​ធ្ងន់​ថា គាត់​មាន​ការ​ព្រួយ​បារម្ភ​សម្រាប់ Man City ដោយ​សារ​តែ​ការ​ប្រកួត​វគ្គ​ពាក់​កណ្តាល​ផ្តាច់ព្រ័ត្រ​នៃ​ក្របខ័ណ្ឌ UEFA Champions League របស់​ពួក​គេ​ត្រូវ​ជួប​ជាមួយ​នឹង Real Madrid។

យ៉ាង​ណា​មិញ​បច្ចុប្បន្ន Manchester City កំពុង​ស្ថិត​ក្នុង​ដំណើរ​ផ្សងព្រេង​ដើម្បី​ឈ្នះពាន​ធំៗ 3 នៅ​ក្នុ​ងដៃ ដោយ​មាន FA Cup, Premier League និង UEFA Champions League។ ពួក​គេ​នឹង​ត្រូវ​ប្រកួត​វគ្គ​ផ្ដាច់ព្រ័ត FA Cup ទល់នឹង Manchester United នៅថ្ងៃ​ទី 3 ខែ​ក្រោយ​នេះ ខណៈ​ដែល​ពួក​គេ​កំពុង​ឈរ​នៅកំពូល​តារាង​របស់ Premier League ផង​ដែរ។ លើស​ពី​នេះ​ទៅ​ទៀត Manchester City ក៏​មាន​ភារកិច្ច​ដ៏​សំខាន់​មួយ​ផ្សេង​ទៀត​គឺ​ត្រូវ​ប៉ះ​នឹង Real Madrid ដែល​ជា​ការ​ប្រកួត UEFA Champions League វគ្គ​ពាក់​កណ្ដាល​ផ្ដាច់ព្រ័ត។

ទោះ​ជា​យ៉ាង​ណា​ក៏​ដោយ ថ្លែង​នៅ​លើ​បណ្តាញ YouTube របស់ Filthy Fellas លោក Richards បាន​និយាយ​ថា៖ “ខ្ញុំ​មិន​គិត​ថា​ពួកគេ (Man City) នឹង​អាច​សម្រេច​បាន​នូវ​ពាន 3 ក្នុង​រដូវកាល​នេះ​ទេ។ ខ្ញុំ​បារម្ភ​អំពី​ការ​ប្រកួត​ទល់​នឹង Real Madrid។ ខ្ញុំ​ពិត​ជា​ព្រួយ​បារម្ភ​ណាស់។ ខ្ញុំ​ត្រូវ​តែ​និយាយ​ដោយ​ស្មោះត្រង់​អំពី​រឿង​នេះ។ ខ្ញុំ​ព្រួយបារម្ភ​អំពី​ពួកគេ ដោយ​គេ​បាន​ធ្លាក់​ចេញ​ក្រោម​ស្នាដៃ Real Madrid កាល​ពី​រដូវកាល​មុន”។

ប្រភព: Dailypos NG