ខ្សែបម្រើ​មួយ​រូប​របស់ PSG ចង់​ចាកចេញ​ទៅ Barcelona តាម Messi ដែរ

យោងតាម​របាយការណ៍​ចុង​ក្រោយ​មួយ​ដែល​ចុះ​ផ្សាយ​ដោយ El Nacional បាន​ឲ្យ​ដឹង​ថា ខ្សែបម្រើ Marco Verratti របស់ Paris Saint-Germain (PSG) មាន​បំណង​ចង់​ចាកចេញ​ពី​ក្លឹប​បច្ចុប្បន្ន​តាម Lionel Messi ដើម្បី​ផ្ទេរ​មក Barcelona នៅ​រដូវ​ក្តៅ​នេះ​ដែរ។ ទោះ​ជា​យ៉ាង​ណា​ក៏​ដោយ​គ្រូ​បង្វឹក​លោក Xavi Hernandez ត្រូវ​បាន​គេ​ដឹង​ថា មិន​ចង់​បាន​ខ្សែបម្រើ​សញ្ជាតិ​អ៊ីតាលី​រូប​នេះ​ឡើយ។

យ៉ាង​ណា​មិញ Verratti គឺ​ជា​ខ្សែបម្រើ​ចាស់​វស្សា​មួយ​រូប ដែល​បាន​ស្នាក់​នៅ​ទ្រនំ​ជាមួយ PSG អស់​រយៈពេល​មួយ​ទសវត្ស​មក​ហើយ។ គាត់​បាន​ចូលរួម​ជាមួយ​ក្លឹប​យក្ស​បារាំង​មួយ​នេះ តាំង​ពី​ឆ្នាំ 2012 មក​ម្ល៉េះ ហើយ​ចាប់​តាំង​ពី​ពេលនោះ​មក គាត់​បាន​បង្ហាញ​ខ្លួន​សរុប​ចំនួន 412 ប្រកួត ដោយ​ស៊ុត​បញ្ចូលទី​បាន 11 គ្រាប់ និង Assists បាន 61 ដង។

ទោះ​បី​ជា​យ៉ាង​ណា​ក៏​ដោយ កាសែត​បារាំង L’Equipe បាន​រាយការណ៍​ថា ខ្សែបម្រើ​ឆ្នើម​រូប​នេះ កំពុង​ស្វែងរក​ច្រក​នៃ​ការ​ចាកចេញ​ពី PSG ហើយ​គោល​ដៅ​របស់​គាត់​គឺ​ចង់​ផ្លាស់​ទៅ​ក្លឹប​យក្ស​កាតា​ឡាន់។ យ៉ាង​​ណា​មិញ Xavi នឹង​ជំទាស់​លើ​រឿង​នេះ ដោយ​សម្រេច​ចិត្ត​ប្រើប្រាស់​កីឡាករ​ក្នុង​ជម្រើស​ដែល​មាន​ស្រាប់​ដូច​ជា Pedri, Gavi, និង Frenkie de Jong ដែល​សុទ្ធសឹង​តែ​ជា​កីឡាករ​នៃ​អនាគត​របស់​ក្លឹប។ ដូច្នេះ​ហើយ គាត់​​មិន​ចង់​បន្ថែម​កីឡាករ​វ័យ 30 ឆ្នាំ​រូប​នេះ​ម្នាក់​ទៀត​នៅ​​ក្នុង​ក្រុម​របស់​ខ្លួន​ឡើយ។

ប្រភព: Sportskeeda