Real Madrid កំពុង​ពិចារណា​ផ្ទេរ​ខ្សែ​ប្រយុទ្ធ​មួយ​រូប​ដែល Barcelona ធ្លាប់​ចង់​បាន

ក្លឹប​អធិរាជស Real Madrid កំពុង​ពិចារណា​លើ​ការ​ចុះ​ហត្ថលេខា​​ខ្សែ​ប្រយុទ្ធ​ស្លាប​សញ្ជាតិ​អេស្ប៉ាញ Dani Olmo ដែល​ត្រូវ​បាន Barcelona បដិសេធ​មិន​ចង់​បាន​កន្លង​មក (នេះ​បើ​យោងតាម​របាយការណ៍​ពី El Nacional)។ យ៉ាង​ណា​មិញ​ខ្សែប្រយុទ្ធ​វ័យ 25 ឆ្នាំ​រូបនេះ គឺ​ជា​កីឡាករ​ដ៏​សំខាន់​សម្រាប់​ក្លឹប RB Leipzig ក្នុង​រយៈ​ពេល​ប៉ុន្មាន​រដូវកាល​ចុង​ក្រោយ​នេះ។

Dani Olmo ដែល​កំពុង​ក្លាយ​ជា​តារា​ឆ្នើម​មួយ​រូប​នៅ Bundesliga ដែរ​នោះ ត្រូវ​បាន​គេ​ដឹង​ថា កំពុង​ស្វែងរក​ការ​ផ្ទេរ​ចេញ​ទៅ​កាន់​ក្លឹប​ថ្មី​មួយ​ដែល​ធំ​ជាង​ក្លឹប​បច្ចុប្បន្ន។ កីឡាករ​ឆ្នើម​រូប​នេះ​កំពុង​ពិចារណា​លើ​សំណើរ​ពីក្លឹប Real Madrid និង Bayern Munich ខណៈ​ដែល​លោក Florentino Perez ជា​ប្រធាន​ក្លឹប Real Madrid មើល​ឃើញ​ថា ការ​ចុះ​ហត្ថលេខា​លើ Dani Olmo ជា​ឱកាស​ដ៏​ល្អ​មួយ។ ពួក​គេ​​បាន​ចាត់​ទុក Dani Olmo ជា​អ្នក​ជំនួស​តំណែង​ដ៏​សាកសម​របស់ Marco Asensio ដែល​ត្រៀម​ចាកចេញ​នៅ​រដូវក្តៅ​នេះ។

ដោយ​ឡែក​ក្លឹប RB Leipzig ត្រូវ​បាន​គេ​រាយការណ៍​ថា នឹង​ទទួល​យក​សំណើរ​នៃ​ការ​ដេញ​ថ្លៃ​លើ Dani Olmo ប្រហែល​ជិត 30 លានអឺរ៉ូ ដោយ​សារ​កុងត្រា​របស់​គាត់​ផុត​កំណត់​នៅ​ឆ្នាំ 2024 ហើយ​កីឡាករ​ផ្ទាល់ ក៏​ធ្លាប់​បាន​ប្រាប់​ក្លឹប​របស់​ខ្លួន​រួច​ហើយ​ថា គាត់​មិន​បន្ត​កុងត្រា​ថ្មី​ជាមួយ RB Leipzig ឡើយ។

ប្រភព: Sportskeeda