Manchester United នឹង​ត្រូវ​ចាយលុយ 70 លានផោន ប្រសិន​បើ​ពួក​គេ​ចង់​ចុះ​ហត្ថលេខា​លើ​អ្នក​ចាំទី​រូប​នេះ

ក្លឹប​បិសាចក្រហម Manchester United នឹង​ត្រូវ​ចំណាយ​ប្រាក់​យ៉ាង​ហោចណាស់ 70 លានផោន ដើម្បី​ចុះ​ហត្ថលេខា​លើ​អ្នកចាំទី​របស់ FC Porto គឺ​កីឡាករ Diogo Costa នៅ​រដូវក្តៅ​នេះ។ កីឡាករ​វ័យ 23 ឆ្នាំ​រូប​នេះ ត្រូវ​បាន​គេ​មើល​ឃើញ​ថា មាន​ទម្រង់​លេង​លេច​ធ្លោរ​ជា​ខ្លាំង ដោយ​គាត់​បាន​រក្សា Clean Sheet ចំនួន 19 ដង ក្នុង​ការ​ប្រកួត​ចំនួន 38 ប្រកួត​នៅ​រដូវកាល​នេះ។

យោងតាម​សារ​ព័ត៌មាន Football Insider បាន​ឲ្យ​ដឹង​ថា បិសាច​ក្រហម​កំពុង​ស្ថិត​គោលដៅ​ចង់​បាន​អ្នក​ចាំទី​ថ្មី​មួយ​រូប​នៅ​ចុង​បញ្ចប់​នៃ​រដូវកាល​នេះ ហើយ​ពួក​គេ​បាន​ចាប់​អារម្មណ៍​លើ Diogo Costa។ ទោះ​បី​ជា​យ៉ាង​ណា​ក៏ដោយ កីឡាករ​សញ្ជាតិ​ព័រទុយហ្គាល់​រូប​នេះ​ទើប​តែ​បាន​បន្ត​កុងត្រា​ថ្មី​ជាមួយ​ក្លឹប​បច្ចុប្បន្ន​កាល​ពី​ខែ​វិច្ឆិកា​ឆ្នាំ​មុន​ប៉ុណ្ណោះ ហើយ​កុងត្រា​នោះ​មាន​សុពលភាព​រហូត​ដល់​ឆ្នាំ 2027។

ជាមួយ​នឹង​កុងត្រា​ដែល​នៅ​ជា​ច្រើន​ឆ្នាំ​ទៀត​នេះ Porto បាន​កំណត់​តម្លៃ​ផ្ទេរ​ចេញ​របស់ Diogo Costa រហូត​ដល់ 70 លានផោន ឯណោះ ដែល​អាច​ចាត់​ទុក​ថា គឺ​ជា​តម្លៃ​ផ្ទេរ​ដ៏​ខ្ពស់​មួយ។ កន្លង​មក​ក្លឹប​បិសាចក្រហម Manchester United ត្រូវ​បាន​គេ​ដឹង​ថា បាន​បញ្ជូន​អ្នក​សង្កេត​ការណ៍​របស់​ខ្លួន​ទៅ​ប្រទេស​ព័រទុយហ្គាល់ ដើម្បី​តាមដាន​មើល Diogo Costa។

ដោយ​ឡែក​ប្រសិន​បើ​បិសាចក្រហម​អាច​ចុះ​ហត្ថលេខា​លើ Diogo Costa នោះ​កីឡាករ​ឆ្នើម​រូប​នេះ​អាច​នឹង​ក្លាយ​ជា​អ្នក​ចាំទី​ដៃ​ទីមួយ ខណៈ​ដែល David de Gea ​រដូវ​កាល​នេះ មិន​មាន​ទម្រង់​លេង​ល្អ​ឡើយ។ David de Gea ត្រូវ​បាន​គេ​រាយការណ៍​ថា បាន​យល់​លើក​កុងត្រា​ថ្មី​ដើម្បី​ស្នាក់​នៅ Old Trafford បន្ត​ទៀត ប៉ុន្តែ​ជាមួយ​នឹង​ទឹកដៃ​ធ្លាក់​ចុះ​របស់​គាត់ អាច​នឹង​ត្រូវ​ក្លឹប​យក Diogo Costa មក​ជំនួស។

ប្រភព: Sportskeeda