គ្រូ​បិសាចក្រហម ចង់​ឲ្យ​ក្លឹប​តម្លើង​ប្រាក់​ខែ​ដល់ Lisandro Martinez នៅ​មុន​រដូវកាល​ថ្មី​ចាប់​ផ្ដើម

ខ្សែការពារ​កណ្តាល​របស់​ក្លឹប​បិសាចក្រហម Manchester United គឺ​កីឡាករ Lisandro Martinez ត្រូវ​បាន​គេ​រាយការណ៍​ថា កំពុង​រំពឹង​លើ​ការ​តម្លើង​ប្រាក់​ពលកម្ម​របស់​ខ្លួន នៅ​មុន​រដូវកាល​ក្រោយ 2023-2024 ចាប់​ផ្ដើម ដែល​នេះ​ដូចជា​រង្វាន់​សម្រាប់​ការ​បង្ហាញ​នូវ​ទម្រង់​លេង​ដ៏​គួរ​ឲ្យ​ចាប់​អារម្មណ៍​របស់​គាត់។

ជា​ការ​ពិត​ណាស់ អតីត​កីឡាករ​របស់​ក្លឹប Ajax រូបនេះ​ដំបូង​ឡើយ​ពិបាក​សម្រប​ខ្លួន​ទៅ​នឹង​ការ​ប្រកួត​ប្រជែង​នៃ​ក្របខ័ណ្ឌ Premier League បន្ទាប់​ពី​ចូលរួម​ជាមួយ​ក្រុម​របស់​លោក Erik ten Hag ក្នុង​កិច្ច​ព្រមព្រៀង​ផ្ទេរ 50.4 លានផោន។ យ៉ាង​ណា Martinez បាន​រីក​ចម្រើន​យ៉ាងលឿន​ក្នុង​នាម​ជា​ខ្សែការពារ​កណ្តាល​ដ៏​សំខាន់​មិន​អាច​ខ្វះបាន​នៅ Old Trafford។

ខ្សែ​ការពារ​កណ្ដាល Lisandro Martinez បាន​​ចុះ​​កុងត្រា​រយៈពេល 5 ឆ្នាំ​រហូត​ដល់​រដូវក្តៅ​ឆ្នាំ 2027 ហើយ​គាត់​ត្រូវ​បាន​គេ​ដឹង​ថា នឹង​ទទួល​បាន​ប្រាក់ឈ្នួល​ប្រចាំ​សប្តាហ៍​ចំនួន 120,000 ផោន​ក្នុង​មួយ​សប្តាហ៍។ របាយការណ៍​មួយ​បាន​ឲ្យ​ដឹង​ថា ក្លឹប​បិសាចក្រហម​មិន​មាន​គម្រោង​បន្ត​កុងត្រា​ថ្មី​លើ​កុងត្រា​បច្ចុប្បន្ន​របស់​គាត់​ទេ ប៉ុន្តែ​លោក Erik ten Hag កំពុង​ជម្រុញ​ឲ្យ​ក្លឹប​តម្លើង​ប្រាក់​ពល​កម្ម​របស់​ខ្សែការពារ​រូប​នេះ​​ដល់ 170,000 ផោន​ក្នុង​មួយ​សប្តាហ៍ ដែល​ជា​ការ​តម្លើង​ថែម 50,000 ផោន។

ប្រភព: Sportsmole