Pep ថា ការ​ប្រកួត​ទល់​នឹង Real Madrid ជើង​ទីពីរ​នេះ Haaland នឹង​មាន​ទម្រង់​លេង​ខុស​ពី​មុន

គ្រូ​បង្វឹក​របស់​ក្លឹប​មេឃខៀវ Manchester City លោក Pep Guardiola បាន​ព្រមាន​ដល់​ក្លឹប​អធិរាជស Real Madrid ថា ពួក​គេ​នឹង​ឃើញ​ខ្សែ​ប្រយុទ្ធ​របស់​គាត់ Erling Haaland មាន​ទម្រង់​លេង​ខុស​ប្លែក​គ្នា នៅ​ក្នុង​​ប្រកួត​ជើង​ទី​ពីរ ដែល​ជា​ការ​ប្រកួត UEFA Champions League វគ្គ​ពាក់​កណ្តាល​ផ្តាច់ព្រ័ត្រ​នៅ​ថ្ងៃ​ទី 18 សប្ដាហ៍​ក្រោយ។

យ៉ាង​ណា​មិញ កាល​ពី​ប្រកួត​ជើង​ទី​មួយ​ក្នុង​ដី Santiago Bernabeu ខ្សែ​ប្រយុទ្ធ​ឆ្នើម Erland Haaland មិន​អាច​រក​គ្រាប់​បាល់​បាន​ឡើយ ហើយ​ថែម​ទាំង​ត្រូវ​បាន​គេ​មើល​ឃើញ​ថា គាត់​ពិត​ជា​មិន​អាច​ទៅ​រួច​ជា​មួយ​នឹង​ប្រព័ន្ធ​ការពារ​របស់ Real Madrid និង​ជា​ពិសេស Antonio Rudiger បាន​តាម​បិទ​ខ្សែ​ប្រយុទ្ធ​រូប​នេះ​ស្ទើរ​មិន​អាច​រើ​ខ្លួន​បាន។

ទោះ​ជា​យ៉ាង​ណា​ក្ដី ជាមួយ​នឹង​ការ​ប្រកួត​ជើង​ទីពីរ ដែល​ត្រូវធ្វើ​ឡើង​ក្នុង​ដី​របស់​ខ្លួន​វិញ​នោះ លោក Pep Guardiola សង្ឃឹម​ថា Haaland នឹង​មាន​ទម្រង់​លេង​ប្រសើរ​ឡើង ហើយ​មិត្ត​រួម​ក្រុម​របស់​គាត់​ក៏​បង្កើន​នូវ​ទម្រង់​លេង​ដើម្បី​ជួយ​ដល់​គាត់​ផងដែរ។ លោក Pep Guardiola បាន​និយាយ​ថា៖ “សូម​អបអរសាទរ​ចំពោះ Rudiger។ សម្រាប់ Haaland យើង​នៅ​តែ​ត្រូវ​ដឹង​ថា ​នៅ​អាយុ 22 ឆ្នាំ វា​គឺ​ជា​លើក​ទី​មួយ​ហើយ​ដែល​គាត់​បាន​លេង​នៅ​វគ្គ​ពាក់កណ្តាល​ផ្តាច់ព្រ័ត្រ​នៃ​ក្របខ័ណ្ឌ UEFA Champions League។ ប្រសិន​បើ​ក្រុម​អាច​លេង​បាន​ល្អ​ជាង​នេះ​បន្តិច នៅ​ក្នុង​ការ​ប្រកួត​ថ្ងៃ 18 ខាង​មុខ​នេះ ប្រហែល​ជា​វា​នឹង​កាន់​តែ​ងាយ​ស្រួល​សម្រាប់​គាត់”។

ប្រភព: Dailypost NG