Connect with us

បាល់ទាត់អន្តរជាតិ

Atletico Madrid ចង់​បាន​លុយ​សុទ្ធ 19 លានអឺរ៉ូ ពី​ការ​លក់ Carrasco ទៅ​ឲ្យ Barcelona ដោយ​មិន​ពាក់​ព័ន្ធ​នឹង​ការ​ដោះដូរ​ណា​មួយ​ឡើយ

Published

on

ក្លឹប Atletico Madrid ត្រូវ​បាន​គេ​រាយការណ៍​ថា បាន​ប្រាប់​ទៅ Barcelona ថា​ពួកគេ​ចង់​បាន​ទឹកប្រាក់ 19 លានអឺរ៉ូ ដើម្បី​អាច​ដោះលែង​ខ្សែប្រយុទ្ធ​ស្លាប Yannick Carrasco ឲ្យ​ទៅ Camp Nou នៅ​រដូវក្តៅ​នេះ។ ដូចគ្នា​នេះ​ដែរ Atletico Madrid មិន​ចាប់​អារម្មណ៍​លើ​កិច្ច​ព្រមព្រៀង​ដោះដូរ​ណា​មួយ​នោះ​ឡើយ ដោយ​ពួក​គេ​ចង់​បាន​ជា​សាច់ប្រាក់​សុទ្ធ​តែ​ម្ដង។

កាល​ពី​ដើម​ឆ្នាំ​នេះ SPORT បាន​រាយការណ៍​ថា កិច្ច​ព្រមព្រៀង​ផ្ទេរ​សម្រាប់ Carrasco ត្រូវ​បាន​ធ្វើ​រួចរាល់​ហើយ ដោយ​កីឡាករ​ឆ្នើម​រូប​នេះ​នឹង​​ផ្ទេរ​មក​កាន់​ក្លឹប​យក្ស​កាតាឡាន់​ក្នុងអំឡុង​ពេល​នៃ​ទីផ្សារ​ដោះដូរ​កីឡាករ​នា​រដូវក្តៅ​នេះ។ ទោះ​បី​ជា​យ៉ាង​ណា​ក៏ដោយ មិន​ទាន់​មាន​ការ​ព្រមព្រៀង​រវាង​ភាគី​ទាំងពីរ​ជា​ផ្លូវការណ៍​នោះ​ទេ ហើយ Barcelona ត្រូវ​បាន​គេ​ដឹង​ថា ពិបាក​ក្នុង​ការ​ចរចា​ជាមួយ​ភាគី​របស់​លោក Diego Simeone ដែល​ជា​គ្រូ​បង្វឹក។

យោងតាម​របាយការណ៍​ពី AS បាន​ឲ្យ​ដឹង​ថា ក្រុម​របស់​លោក Xavi Hernandez ចង់​ចុះ​ហត្ថលេខា​លើ Carrasco ដោយ​មាន​បូក​បញ្ចូល​ទាំង Ferran Torres ក្នុង​កិច្ច​ព្រមព្រៀង​នោះ។ ទោះ​ជា​យ៉ាង​ណា​ក៏ដោយ របាយការណ៍​ដដែល​នោះ​ដែរ​បានអះអាង​ថា Torres មិន​ចាប់​អារម្មណ៍​នឹង​ការ​ផ្ទេរ​ទៅ​កាន់ Atletico Madrid នោះ​ទេ ខណៈ​ដែល​ក្រុម​របស់​លោក Diego Simeone ក៏​មិន​ចង់​បាន​កីឡាករ​សញ្ជាតិ​អេស្ប៉ាញ​រូបនេះ​ដែរ។ ពេលនេះ Atletico Madrid ត្រូវ​បាន​គេ​ដឹង​ថា នឹង​លក់​កីឡាករ​សញ្ជាតិ​បែលហ្ស៊ិក Yannick Carrasco ជាមួយ​នឹង​ទឹកប្រាក់​សុទ្ធ​ក្នុង​តម្លៃ​ដែល​គេ​ចង់​បាន ស្រប​ពេល​ដែល​កុងត្រា​របស់​ខ្សែ​ប្រយុទ្ធ​ស្លាប​រូប​នេះ​នឹង​ផុត​កំណត់​នៅ​រដូវក្តៅ​ឆ្នាំ 2024។

ប្រភព: Sportsmole

Trending

© រក្សា​សិទ្ធិ​គ្រប់​យ៉ាង​ដោយ​ X-SPORT ឆ្នាំ​ ២០២២