គ្រូ Brighton បញ្ជាក់​ថា Moises Caicedo និង Mac Allister នឹង​ចាកចេញ​ពី​ក្លឹប​នៅ​រដូវក្ដៅ​នេះ

គ្រូ​បង្វឹក​របស់​ក្លឹប Brighton លោក Roberto De Zerbi បាន​សារភាព​ថា ក្រុម​របស់​គាត់​នឹង​បាត់​បង់​កីឡាករ​សំខាន់ៗ 2 រូប​គឺ Moises Caicedo និង Alexis Mac Allister ដោយ​សារ​ពួក​គេ​នឹង​ផ្ទេរ​ទៅ​ក្លឹប​ថ្មី​នៅ​រដូវក្តៅ​នេះ។ គ្រប់​គ្នា​មើល​ឃើញ​ថា Caicedo និង Mac Allister គឺ​ជា​កីឡាករ​ដែល​មាន​ទម្រង់​លេង​លេច​ធ្លោរ​បំផុត​ក្នុង​ចំណោម​កីឡាករ​ទាំងអស់​របស់​ក្លឹប Brighton ក្នុង​រដូវ​កាល​នេះ ហើយ​ជា​លទ្ធផល អ្នក​ទាំង​ពីរ​បាន​ទាក់ទាញ​ការ​ចង់​បាន​ពី​ក្លឹប​ធំៗ​ជា​ច្រើន។

ខ្សែបម្រើ Moises Caicedo ត្រូវ​បាន​ផ្សារ​ភ្ជាប់​ជាមួយ​នឹង​ការ​ផ្ទេរ​ទៅ Arsenal, Manchester United, Chelsea និង Liverpool ខណៈ​ដែល Mac Allister ត្រូវ​បាន​ផ្សារភ្ជាប់​យ៉ាង​ខ្លាំង​ជាមួយ​នឹង Liverpool និង​តោខៀវ Chelsea។ ថ្លែង​ទៅ​កាន់ Sky Sports បន្ទាប់​ពី Brighton បាន​យក​ឈ្នះ Arsenal 3-0 ក្នុង​ការ​ប្រកួត Premier League កាល​ពី​ម្សិលមិញ De Zerbi បាន​បង្ហើប​ថា ក្រុម​របស់​គាត់​នឹង​បាត់​បង់​កីឡាករ​សំខាន់ៗ​មួយ​ចំនួន​នៅ​រដូវ​ក្ដៅ​ខាង​មុខ។

លោក Roberto De Zerbi បាន​និយាយ​ថា៖ “ប្រាកដ​ណាស់ យើង​នឹង​បាត់បង់​កីឡាករ​មួយ​ចំនួន ដែល​នោះ​ប្រហែល​ជា Caicedo ហើយ​ក៏​ប្រហែល​ជា Mac Allister ដែរ។ យ៉ាង​ណា​យើង​​ត្រូវ​​តែ​​ត្រៀម​ខ្លួន ដើម្បី​នាំ​យក​កីឡាករ​ចំណូល​ថ្មី​ល្អៗ​ផ្សេង​ទៀត”។

ប្រភព: Dailypost NG