Xavi ចង់​ឲ្យ​ក្លឹប​ចុះ​ហត្ថលេខា​លើ​ខ្សែបម្រើ​រូប​នេះ​ពី Real Sociedad ដើម្បី​មក​ជំនួស​កន្លែង​របស់ Busquets

គ្រូ​បង្វឹក​របស់​ក្លឹប​អ្នក​មាន​បុណ្យ Barcelona លោក Xavi Hernandez ត្រូវ​បាន​គេ​រាយការណ៍​ថា ចង់​ចុះ​ហត្ថលេខា​លើ​កីឡាករ Martin Zubimendi របស់​ក្លឹប Real Sociedad ដើម្បី​មក​ជំនួស​តំណែង​របស់ Sergio Busquets។ យ៉ាង​ណា​មិញ កាល​ពី​សប្តាហ៍​មុន Busquets បាន​ប្រកាស​ចាកចេញ​ពី​ក្លឹប​យក្ស​កាតាឡាន់ ដែល​ខ្លួន​ធ្លាប់​រួមរស់​ជាមួយ​អស់​រយៈពេល 15 ឆ្នាំ នៅ​ពេលកុងត្រា​ផុត​កំណត់​ចុង​បញ្ចប់​នៃ​រដូវកាល​នេះ។

ក្លឹប Barcelona ធ្លាប់​បាន​សម្លឹង​មើល​កីឡាករ​ជា​ច្រើន​រួច​មក​ហើយ តាំង​ពី​ពេល​ដែល​ពួក​គេ​ដឹង​ថា Sergio Busquets នឹង​ត្រូវ​ចាកចេញ​មក​ម្ល៉េះ។ ខណៈ​ដែល​ពួក​គេ​កំពុង​ស្វែងរក​បេក្ខភាព​កីឡាករ​ចំណូល​ថ្មី​ដែល​អាច​ជំនួស Busquets បាន​នោះ ខ្សែបម្រើ​សញ្ជាតិ​អេស្ប៉ាញ Martin Zubimendi ត្រូវ​បាន​គេ​ជឿ​ថា ជា​កីឡាករ​ម្នាក់​ដែល​ស្ថិត​ក្នុង​បញ្ជី​គោលដៅ​របស់ Barcelona ដែរ។ កន្លង​មក Xavi ធ្លាប់​បាន​សរសើរ​ដល់​កីឡាករ​វ័យ 24 ឆ្នាំរូបនេះ​ថា ជា​កីឡាករ​ដ៏​អស្ចារ្យ ដែល​មាន​កាយសម្បទា បច្ចេកទេស និង​ល្បឿន​លឿន។

យោងតាម​ការអះអាង​របស់​អ្នក​កាសែត Sique Rodriguez ដែល​ចុះ​ផ្សាយ​នៅ​លើ Barca Universal បាន​ឲ្យ​ដឹង​ថា Barcelona មាន​ឧបសគ្គ​ធំ ក្នុង​ការ​នាំ​យក Zubimendi ទៅ Camp Nou នៅ​រដូវក្តៅ​នេះ ដោយ​ពួក​គេ​មិន​អាច​សម្រួល​បញ្ហា​ហិរញ្ញវត្ថុ​របស់​ពួក​គេ​បាន​នៅ​ឡើយ​ទេ ហើយ​ខ្សែបម្រើ​រូប​នេះ មាន​កុងត្រា​ជាមួយ Real Sociedad ដល់​ឆ្នាំ 2027 និង​មាន​តម្លៃ​ផ្ទេរ​ចេញ​រហូត​ដល់ 60 លានអឺរ៉ូ (52.9 លានផោន)។

ប្រភព: Sportsmole