តើ​លោក Pep Guardiola ធ្លាប់​ដឹកនាំ​ក្រុម​ឲ្យ​ឈ្នះ​ពាន UCL បាន​ប៉ុន្មាន​ដង​ហើយ ក្នុង​អាជីព​របស់​ខ្លួន?

គ្រូ​បង្វឹក​លោក Pep Guardiola បាន​នាំ Manchester City ទៅ​កាន់​វគ្គ​ផ្តាច់ព្រ័ត្រ UEFA Champions League ជា​ថ្មី​ម្ដង​ទៀត ហើយ​មាន​មនុស្ស​ជា​ច្រើន​ឆ្ងល់​ថា តើ​គ្រូ​បង្វឹក​ដ៏​ឆ្នើម​រូប​នេះ ធ្លាប់​បាន​ឈ្នះពាន​មួយ​នេះ​ប៉ុន្មាន​ដង​ហើយ​មក​ទល់​ពេល​នឹង​បច្ចុប្បន្ន។

គ្រូ​បង្វឹក​របស់​ក្លឹប Manchester City រូប​នេះ កំពុង​តែ​សម្លឹង​មើល​ការ​បង្កើត​កេរ្តិ៍ឈ្មោះ​របស់​គាត់​ឲ្យ​កាន់​តែ​ល្បីល្បាញ​ខ្លាំង តាមរយៈ​ការ​ឈ្នះពាន UEFA Champions League ជាមួយ Manchester City នៅ​រដូវកាល​នេះ ហើយ​ពួក​គេ​ត្រូវ​តទល់​នឹង​ក្រុម​ខ្លាំង​មក​ពី​អ៊ីតាលី Inter Milan។ ប្រសិន​បើ Man City អាច​ឈ្នះ Inter Milan ហើយ​លើក​ពាន UCL បាន នោះ​លោក Pep Guardiola នឹង​ត្រូវ​ចារ​ឈ្មោះ​ក្នុង​ប្រវត្តិសាស្ត្រ​របស់​ក្លឹប ព្រោះ Man City មិន​ដែល​ឈ្នះពាន​នេះ​ឡើយ។

តើ Pep Guardiola ធ្លាប់​បាន​ឈ្នះពាន UEFA Champions League នេះ​ប៉ុន្មាន​ដង​ហើយ? ក្នុង​នាម​ជា​គ្រូ​បង្វឹក គាត់​ធ្លាប់​បាន​ឈ្នះ​ពាន​នេះ​តែ 2 ដង​ប៉ុណ្ណោះ គឺ​ពេល​ដែល​គាត់​ដឹកនាំ​នៅ Barcelona ក្នុង​អំឡុង​ពេល​ដែល Messi កំពុង​ឡើងជើង​ខ្លាំង។ នៅ​រដូវកាល​ឆ្នាំ 2008-2009 Barcelona បាន​ឈ្នះពាន UCL ដោយ​យក​ឈ្នះ​ទៅ​លើ Manchester United 2-0 ហើយ​កីឡាករ​ដែល​ស៊ុត​បញ្ចូលទី​គឺ Samuel Eto’o និង Lionel Messi។ ដោយ​ឡែក​នៅ​រដូវកាល​ឆ្នាំ 2010-2011 គ្រូ​បង្វឹក​រូប​នេះ បាន​នាំ Barcelona ឡើង​វគ្គ​ផ្ដាច់ព្រ័ត និង​ឈ្នះពាន UCL នេះ​ជា​ថ្មី​ម្ដង​ទៀត ដោយ​យក​ឈ្នះ Manchester United ដដែល ក្នុង​លទ្ធផល 3-1។

ប្រភព: Mscfootball