Lionel Messi កំពុង​ត្រូវ​បាន​ក្លឹប​មួយ​ចំនួន​នៅ Premier League ចាប់​អារម្មណ៍

តារា​ឆ្នើម Lionel Messi របស់​ក្លឹប​យក្ស​បារាំង Paris Saint-Germain ត្រូវ​បាន​គេ​រាយការណ៍​ថា កំពុង​ទាក់ទាញ​ចំណាប់​អារម្មណ៍​ពី​ក្លឹប​មួយ​ចំនួន​នៅ Premier League។ កីឡាករ​វ័យ 35 ឆ្នាំ​រូបនេះ​នឹង​ផុត​កុងត្រា​រយៈពេល 2 ឆ្នាំ​របស់​គាត់​នៅ Parc des Princes ក្នុង​ខែ​ក្រោយ​នេះ​ហើយ ហើយ​ក៏​ត្រៀម​នឹង​ចាកចេញ​ដោយ​គ្មាន​តម្លៃ​ខ្លួន​ផង​ដែរ។

Messi ត្រូវ​បាន​ផ្សារ​ភ្ជាប់​យ៉ាង​ខ្លាំង​ជាមួយ​នឹង​ការ​វិល​ត្រឡប់​ទៅ​កាន់​អតីត​ក្លឹប​ចាស់ Barcelona វិញ ដោយ​គ្រូ​បង្វឹក​បច្ចុប្បន្ន​លោក Xavi Hernandez ថ្មីៗ​នេះ​ក៏​បាន​បង្ហើប​ថា គាត់​បាន​ពិភាក្សា​ជាមួយ​នឹង​ខ្សែ​ប្រយុទ្ធ​ឆ្នើម​រូប​នេះ ជុំវិញ​ការ​ផ្ទេរ​ទៅ​ Camp Nou នៅ​មុន​រដូវកាល​ក្រោយ​ចាប់​ផ្ដើម​ផង​ដែរ។

ទន្ទឹម​នឹង​នេះ Messi ត្រូវ​បាន​គេ​ជឿ​ថា ចង់​ត្រឡប់​ទៅ Barcelona វិញ​នៅ​រដូវក្តៅ​ខាង​មុខ ប៉ុន្តែ Barcelona នឹង​ត្រូវ​ដោះស្រាយ​បញ្ហា​នៃ​តុល្យភាព​ហិរញ្ញ​វត្ថុ​របស់​ខ្លួន​ជាមួយ​នឹង​ការ​លក់​កីឡាករ​មួយ​ចំនួន​ចេញ​ជា​មុន​សិន ទើប​អាច​ចុះ​ហត្ថលេខា​លើ​កីឡាករ​អាហ្សង់ទីន​រូប​នេះ​បាន។

ស្រប​ពេល​ដែល Barcelona កំពុង​ជាប់​គាំង​លើ​ការ​ផ្ទេរ Lionel Messi ក្លឹប Al-Hilal នៅ​អារ៉ាប៊ីសាអូឌីត រួម​ទាំង​ក្លឹប Inter Miami នៅ MLS កំពុង​ទាក់ទង​ផ្ទេរ​គាត់​ផង​ដែរ។ ម្ចាស់ពាន Ballon d’or 7 សម័យ​កាល​រូប​នេះ កំពុង​មាន​ជម្រើស​ជា​ច្រើន​នៅ​ចំពោះ​មុខ ដែល​គាត់​មិន​ទាន់​សម្រេច​ចិត្ត​ជ្រើស​យក។

យោងតាម​សារព័ត៌មាន​របស់​អេស្ប៉ាញ Ole បាន​ឲ្យ​ដឹង​ថា ពេល​នេះ​មាន​ក្លឹប​នៅ Premier League ក៏​បាន​ចូល​ប្រជែង​ក្នុង​ការ​ចុះ​ហត្ថលេខា​លើ Messi ដែរ។ ក្លឹប​ម្ចាស់​ជើង​ឯក Premier League គឺ Manchester City ដែល​ដឹកនាំ​ដោយ​លោក Pep Guardiola ជា​ក្លឹប​មួយ​ក្នុង​ចំណោម​ក្លឹប​ផ្សេង​ទៀត​ដែល​នឹង​ពិចារណា​លើ​លទ្ធភាព​នៃ​នាំ​យក Messi ទៅ​ទឹកដី​អង់គ្លេស។ ក្រៅ​ពី​នេះ Manchester United ក៏​កំពុង​ត្រៀម​ឱកាស​ដើម្បី​ចុះ​ហត្ថលេខា​លើ Messi ដូចគ្នា ខណៈ​ដែល​គេ​ជឿថា ក្លឹប​បិសាចក្រហម​នឹង​ផ្ទេរ Neymar ពី PSG ហើយ Messi ក៏​នឹង​អាច​មក Old Trafford ដែរ។

ប្រភព: Sportsmole