Pierre Aubameyang កំពុង​ចរចា​ផ្ទេរ​ទៅ​លេង​នៅ​អារ៉ាប៊ីសាអូឌីត

យោងតាម​របាយការណ៍​ចុង​ក្រោយ​មួយ​ពី​លោក Fabrizio Romano បាន​ឲ្យ​ដឹង​ថា ក្លឹប Al Ahli និង Al Shabab បាន​ទៅ​ជួប​ខ្សែ​ប្រយុទ្ធ Pierre Aubameyang ដោយ​ផ្ទាល់ ដើម្បី​ពិភាក្សា​អំពី​លទ្ធភាព​នៃ​ការ​ផ្ទេរ​ទៅ​កាន់​ក្លឹបរបស់​ពួក​គេ ក្នុង​លីគ​កំពូល​របស់​ប្រទេស​អារ៉ាប៊ីសាអូឌីត។

យ៉ាង​ណា​មិញ​កាល​ពី​ខែ​កុម្ភៈ​កន្លង​ទៅ Pierre Aubameyang បាន​បដិសេធ​ការ​ចង់​បាន​ពី​ក្លឹប Los Angeles FC ដែល​ស្ថិត​នៅ​ក្នុង​លីគ MLS របស់​អាមេរិច ដោយ​សារ​តែ​ពេល​នោះ​គាត់ ចង់​បន្ត​លេង​នៅ​ក្នុង​បាល់ទាត់​អាជីព​របស់​លីគ​កំពូល​ក្នុង​តំបន់​អឺរ៉ុប។ ដោយ​ឡែក គ្មាន​ការ​សង្ស័យ​ទៀត​ឡើយ ដែល Aubameyang ប្រាកដ​ជា​នឹង​ចាកចេញ​ពី​ក្លឹប​តោខៀវ Chelsea នៅ​ពេល​ឆាប់ៗ​ខាង​មុខ​នេះ។

គួរ​រំលឹក​ផង​ដែរ​ថា នៅ​ថ្ងៃ​ទី 2 ខែ​កញ្ញា ឆ្នាំ 2022 ក្លឹប​តោខៀវ Chelsea បាន​ចុះ​ហត្ថលេខា​លើ Aubameyang ជាមួយ​នឹង​កុងត្រា​រយៈពេល 2 ឆ្នាំ ដោយ​ផ្ទេរ​ពី Barcelona ក្នុង​តម្លៃ​ 12 លាន​អឺរ៉ូ (10.3 លាន​ផោន)។ ជាមួយ​តោខៀវ ទម្រង់​លេង​របស់ Aubameyang មិន​ល្អ​ដូច​ពេល​ដែល​គាត់​លេង​ជាមួយ​ក្លឹប​យក្ស​កាតាឡាន់​ឡើយ។ គាត់​បាន​បង្ហាញ​ខ្លួន​នៅ​ក្នុង​ការ​ប្រកួត​លីគ​ត្រឹមតែ 21 ប្រកួត​ប៉ុណ្ណោះ ដែល​ភាគ​ច្រើន​ជា​កីឡាករ​បម្រុង និង​ស៊ុត​បញ្ចូលទី​បាន 3 គ្រាប់។

ប្រភព: Fabrizio Romano