Manchester City យក​ឈ្នះក្លឹប Real Madrid 4 ទល់នឹង 3 ក្នុង​វគ្គ​ពាក់​កណ្ដាល​ផ្ដាច់​ព្រ័ត UCL ជើង​ទី​មួយ

ក្លឹប​មេឃខៀវ Manchester City បានធ្វើ​ការ​ប្រកួត​យក​ឈ្នះ​ក្លឹប​យក្ស​មក​ពី​អេស្ប៉ាញ Real Madrid ក្នុង​លទ្ធផល 4-3 ដែល​ជា​​ការ​ប្រកួត​ជើង​ទី​មួយ នៃ​ពាន​រង្វាន់ UEFA Champions League វគ្គ​ពាក់​កណ្តាលផ្តាច់ព្រ័ត្រ ដែល​ធ្វើ​ឡើង​ទៅ​កីឡាដ្ឋាន Etihad របស់​ក្លឹប Manchester City។

វា​ជា​រឿង​ដ៏​ភ្ញាក់​ផ្ដើល​មួយ​សម្រាប់​ការប្រកួត​រវាង​ក្រុម​ទាំងពីរ ខណៈ​ដែល​មាន​គ្រាប់​បាល់​កើត​ឡើង​ក្នុង​ការ​ប្រកួត​រហូត​ដល់ 7 គ្រាប់ និង​មាន​បាល់​ប៉េណាល់ទី​មួយ​គ្រាប់​ក្នុង​នោះ​ដែរ។

កាល​ពី​ចាប់​ផ្ដើម​ការ​ប្រកួត​បើក​ឆាក​ដំបូង ក្លឹប Manchester City គ្រប់​គ្រង​បាល់​ស្ទើរ​តែ​​ទាំង​ស្រុង ហើយ​បាន​នាំ​មុខ Real Madrid ​ក្នុង​​លទ្ធផល 2-0 ត្រឹម​តែ​រយៈពេល 11 នាទី​ដំបូង​ប៉ុណ្ណោះ។ ទោះ​បី​ជា​យ៉ាង​ណា ក្លឹប​ស្ដេចស Real Madrid បាន​ស៊ុត​មួយ​គ្រាប់​តាម​ពី​ក្រោយ ដែល​ធ្វើ​បាន​ដោយ​ខ្សែ​ប្រយុទ្ធ​ឆ្នើម Karim Benzema។

គ្រាប់​បាល់​ទាំង​បួន​គ្រាប់​របស់ Manchester City ស៊ុត​បញ្ចូល​ទី​ដោយ​កីឡាករ Kevin De Bruyne នៅ​នាទីទី 2, Gabriel Jesus នៅ​នាទីទី 11, Phil Foden នៅ​នាទីទី 53, Bernardo Silva នៅ​នាទីទី 74។ ដោយ​ឡែក​គ្រាប់​បាល់​បី​គ្រាប់​របស់ Real Madrid គឺ​ស៊ុត​បញ្ចូល​ទី​ដោយ Karim Benzema នៅ​នាទីទី 33, Vinícius Jr នៅ​នាទីទី 55 និង Karim Benzema ដដែល​នៅ​នាទីទី 82 ដែល​ជា​បាល់​ប៉េណាល់ទី។

ទស្សនាវីដេអូ​ហាយឡាយ​ការ​ប្រកួត​ខាងក្រោម

ប្រភព: 90 Min