Yamila Rodriguez សំណូម​ពរ​ឲ្យ​អ្នកគាំទ្រ​បញ្ឈប់​ការ​ផ្ញើ​សារ​រំខាន និង​ឌឺដង​ដាក់​នាង

កីឡា​ការិនី​ Yamila Rodriguez កំពុង​ប្រឈម​នឹង​បញ្ហា​ផ្លូវ​ចិត្ត​ដ៏​លំបាក​មួយ ដោយ​សារ​អ្នកគាំទ្រ​ជា​ច្រើន​បាន​ផ្ញើ​សារ​ទៅ​ជេរ​ប្រមាថ និង​ស្ដី​បន្ទោស​នាង។ Yamila Rodriguez ដែល​ជា​កីឡាករ​ក្នុង​ក្រុម​ជម្រើស​ជាតិ​អាហ្សង់ទីន​ផ្នែក​នារី​វ័យ 25 ឆ្នាំ កំពុង​ប្រកប​អាជី​ព​នៅ​ក្លឹប Boca Juniors ត្រូវ​បាន​គេ​ដឹង​ថា ជា​អ្នកគាំទ្រ​ដ៏​ស្មោះស្ម័គ្រ​ម្នាក់​របស់​តារា​ឆ្នើម Cristiano Ronaldo។

Yamila Rodriguez ត្រូវ​បាន​អ្នកគាំទ្រ Lionel Messi និង​ក្រុម​ជម្រើស​ជាតិ​អាហ្សង់ទីន​ជា​ច្រើន​រិះគន់​ជា​ថ្មី​ម្ដង​ទៀត បន្ទាប់​ពី​ការ​ប្រកួត​ដំបូង​របស់​បាល់ទាត់​នារី​អាហ្សង់ទីន ចាញ់​ក្រោម​ថ្វី​ជើង​អ៊ីតាលី។ ភាព​ចម្រូងចម្រាស​នៅ​លើ​ប្រព័ន្ធផ្សព្វផ្សាយ​ចាប់​ផ្ដើម​ផ្ទុះ​ឡើង ដោយ​ពួក​គេ​ផ្ដោត​សំខាន់​លើ​ការ​រិះ​គន់​​សាក់​របស់​នាង ដែល​សាក់​នោះ​គឺ​ជា​រូប​របស់ Cristiano Ronaldo។ តាម​ពិត​ទៅ Rodriguez បាន​សាក់​រូប​នេះ​ជា​យូរ​មក​ហើយ ហើយ​ក៏​មាន​ទាំង​រូប​របស់ Diego Maradona នៅ​​ភ្លៅ​​​នាង​ផង​ដែរ។

Rodriguez បាន​ផុស​នៅ​លើ​គណនី Instagram របស់​នាង​ដោយ​សំណូម​ពរ កុំ​ឲ្យ​អ្នកគាំទ្រ​ព្យាយាម​ធ្វើ​បាប​ចិត្ត​នាង​បន្ត​ទៀត ហើយ​បាន​សរសេរ​ថា៖ “សូម​ឈប់! ខ្ញុំ​មិន​មានពេល​វេលា​ល្អ​ទេ។ ត្រង់​ចំណុច​ណា​ដែល​ខ្ញុំ​និយាយ​ថា ខ្ញុំ​ស្អប់ Messi?… តើ​អ្នក​មិន​អាច​មាន idol រឺ​កីឡាករ​ដែល​អ្នក​ចូលចិត្ត​បាន​ទេ? Messi គឺ​ជា​ប្រធាន​ក្រុម​ដ៏​អស្ចារ្យ​របស់​យើង​នៅ​ក្នុង​ក្រុម​ជម្រើស​ជាតិ ប៉ុន្តែ​ការ​ដែល​ខ្ញុំ​និយាយ​ថា ការ​លើក​ទឹក​ចិត្ត​របស់​ខ្ញុំ និង​ជា Idol របស់​ខ្ញុំគឺ CR7 មិនមែន​មាន​ន័យ​ថា ខ្ញុំ​ស្អប់ Messi នោះ​ទេ។ តើ​មាន​បញ្ហាអ្វី? វា​មិន​មែន​ជា​ភារកិច្ច​ទេ ដែលយើង​ត្រូវ​​​​ស្រឡាញ់​តែ​កីឡាករ​ក្នុង​ប្រទេស​របស់​យើង”។

ប្រភព: Hola