ចាញ់ Copenhagen កាល​ពី​ម្សិលមិញ បិសាចក្រហម​បាន​បង្កើត​កំណត់ត្រា​មួយ​ចំនួន​គួរ​ឲ្យ​កត់សម្គាល់

ក្លឹបបិសាចក្រហម Manchester United បាន​បង្កើត​ប្រវត្តិសាស្ត្រ​មួយ​ដែល​ពួក​គេ​មិន​ចង់​បាន នៅ​ក្នុង​ការ​បរាជ័យ​ដ៏​គួរ​ឲ្យ​ភ្ញាក់​ផ្អើល​របស់​ពួក​គេ​ក្នុង​លទ្ធផល 4-3 ក្រោម​ស្នាដៃ​ក្រុម​ម្ចាស់​ផ្ទះ Copenhagen ដែល​ជា​ការ​ប្រកួត​ក្របខ័ណ្ឌ UEFA Champions League កាល​ពី​រំលង​អាធ្រាត​យប់​មិញ។

Rasmus Hojlund រក​គ្រាប់​បាល់​ស៊ុត​បញ្ចូលទី​បាន 2 គ្រាប់ សម្រាប់​ការ​ប្រកួត​ត្រឹម 28 នាទី​ដំបូង ដើម្បី​ជួយ​ឲ្យ​បិសាច​ក្រហម​មាន​ក្ដី​សង្ឃឹម​ក្នុង​ការ​ទទួល​បាន 3 ពិន្ទុ​ពី​ការ​ប្រកួត​នោះ។ ទោះ​ជា​យ៉ាង​ណា រឿង​អកុសល​បាន​កើត​ឡើង ដោយ Marcus Rashford ត្រូវ​បាន​ពិន័យ​កាតក្រហម​នៅ​នាទីទី 42 ដែល​ធ្វើ​ឲ្យ​ពួក​គេ​ត្រូវ​បាត់បង់​បេក្ខភាព​កីឡាករ​សំខាន់​ម្នាក់ ហើយ​ត្រូវ​បង្ខំ​ចិត្ត​លេង​ដោយ​មាន​គ្នា 10 នាក់ ទល់​នឹង 11 នាក់។ ក្រោយ​ចប់​ការ​ប្រកួត Copenhagen គឺ​ជា​អ្នកដែល​ទទួល​បាន 3 ពិន្ទុ ដោយ​បាន​យក​ឈ្នះ Manchester United ក្នុង​លទ្ធផល 4 ទល់​នឹង 3។

ទន្ទឹម​នឹង​នេះ​ដែរ ការ​បរាជ័យ​នេះ គឺ​ជា​លើក​ទីមួយ​របស់​ពួក​គេ ដែល​ចាញ់​ក្នុង​ការ​ប្រកួត​បើកឆាក​ចំនួន 9 ប្រកួត ក្នុង​ចំណោម 17 ប្រកួត ជា​លើក​ដំបូង​គិត​ចាប់​តាំង​ពី​រដូវកាល​ឆ្នាំ 1973-1974 មក។ យ៉ាង​ណា​ក៏ដោយ​ពួក​គេ​មាន​កំណត់ត្រា​ល្អ​មួយ​ផ្សេង​ទៀត គឺ​ខ្សែប្រយុទ្ធ Hojlund បាន​ក្លាយ​ជា​កីឡាករ​ដំបូង​បំផុត​ក្នុង​ប្រវត្តិសាស្ត្រ​របស់ Man United ដែល​ស៊ុត​បញ្ចូលទី​បាន 5 គ្រាប់ ក្នុង​ការ​បង្ហាញ​ខ្លួន​ក្នុង​ក្របខ័ណ្ឌ UEFA Champions League 4 ប្រកួត​ដំបូង​សម្រាប់​ក្លឹប។ កីឡាករ​សញ្ជាតិ​ដាណឺម៉ាក​រូបនេះ​ក៏​បាន​ក្លាយ​ជា​កីឡាករ​ក្មេង​បំផុត​ដែល​ស៊ុតបញ្ចូលទី​បាន​ 2 គ្រាប់ ក្នុង​ការប្រកួត​ក្រៅដី​ក្នុង​ក្របខ័ណ្ឌ UEFA Champions League សម្រាប់​បិសាចក្រហម​ផង​ដែរ។

ប្រភព: Sportsmole