Cristiano Ronaldo នឹង​មិន​ចាកចេញ​ពី​បិសាចក្រហម​ឡើយ ដរាប​ណា​គ្រូ​បង្វឹក​នៅ​តែ​ប្រើប្រាស់​គាត់

តារា​ឆ្នើម Cristiano Ronaldo បាន​ប្រាប់​ក្លឹប​បិសាចក្រហម Manchester United របស់​ខ្លួន​ថា គាត់​សុខចិត្ត​ស្នាក់នៅ​ក្លឹប​នៅ​រដូវ​កាលក្រោយ​បន្ត​ទៀត ដរាប​ណា​អ្នក​ចាត់ការ​ថ្មី​លោក Erik ten Hag ដាក់​គាត់​នៅ​ក្នុង​ផែន​ការ​របស់​ខ្លួន។

តារាឆ្នើម​សញ្ជាតិ​ព័រទុយហ្គាល់​វ័យ 37 ឆ្នាំ​រូប​នេះ ទំនង​ជា​ចង់​ទទួល​បាន​ពេលវេលា​ចុងក្រោយ​នៃ​អាជីព​បាល់ទាត់​របស់​គាត់​នៅ Old Trafford បើ​ទោះ​បី​ជា​បិសាចក្រហម​បរាជ័យ​ក្នុង​ការ​ដណ្តើម​យក​កៅអី​សម្រាប់​លេង UEFA Champions League ឆ្នាំ​ក្រោយ​ក៏​ដោយ។

អ្នក​គាំទ្រ​ជា​ច្រើន ហាក់​ដូច​ជា​ទទួល​បាន​ការ​​ភ័យ​ខ្លាច​ដោយ Ronaldo អាច​នឹង​ចាកចេញ​ពី​ក្លឹប បន្ទាប់​ពី​ក្លឹប​មិន​បាន​លេង​ពាន UEFA Champions League ព្រោះ​ជា​ធម្មតា Cristiano Ronaldo តែងតែ​ចាត់​ទុក​ការ​ប្រជែងពាន UCL ជា​ការ​ប្រកួត​ប្រជែង​ដែល​ខ្លួន​ពេញ​ចិត្ត​បំផុត។

ប៉ុន្តែ​មុន​ពេល​មក​ដល់​របស់​គ្រូ​បង្វឹក​ថ្មី​លោក Erik ten Hag នោះ ប្រភព​មួយ​ពី​បិសាចក្រហម Man United បាន​បង្ហាញ​ថា: “Ronaldo បាន​ប្រាប់​មិត្តរួម​ក្រុម​របស់​គាត់​ថា គាត់​នឹង​មិន​ទៅ​ណា​ទេ លុះ​ត្រាតែ​ក្លឹប​និយាយ​ថា ពួកគេ​លែង​ត្រូវ​ការ​គាត់”។

ប្រភព​ដដែល​នោះ ថែម​ទាំង​បាន​និយាយ​ទៀត​ថា: “គ្មាន​នរណា​ម្នាក់​ខក​ចិត្ត​ជាង​គាត់ នៅ​រដូវកាល​​ដែល​ក្លឹប​ធ្លាក់​ចុះ​ខ្លាំង​បែប​នេះ​ឡើយ។ ប៉ុន្តែ​គាត់​មិន​ចង់​ចាកចេញ ខណៈ​ដែល​ក្លឹប​កំពុង​ធ្លាក់​ដុនដាប​ឡើយ ហើយ​ចង់​ជួយ​ក្លឹប​ឲ្យ​ត្រឡប់​ទៅ​កាន់ UEFA Champions League វិញ និង​ព្យាយាម​ឈ្នះពាន​​នៅ​ឆ្នាំក្រោយ”។

ប្រភព: Thesun