Marcelo ចង់​ស្នាក់​នៅ Real Madrid បន្ត​ទៀត ទោះ​ជា​មិន​សូវ​បាន​ចូល​លេង​ក៏​ដោយ

ខ្សែការពារ​ស្លាប Marcelo ចង់​បន្ត​ជា​ជីព​បាល់ទាត់​របស់​គាត់​បន្ត​ទៀត ជា​ពិសេស​គឺ​នៅ​ជា​កីឡាករ​របស់​ក្លឹប Real Madrid។ គាត់​មិន​ចង់​ក្លាយ​ជា​កីឡាករ​នៅ​ក្លឹប​ណា​ផ្សេង ក្រៅ​ពី​ក្លឹប​បច្ចុប្បន្ន​ដែល​គាត់​ស្រឡាញ់​នេះ​ឡើយ។ កុងត្រា​របស់​កីឡាករ​សញ្ជាតិ​ប្រេស៊ីល​រូប​នេះ នឹង​ផុត​កំណត់​នៅ​ថ្ងៃទី 30 ខែ​មិថុនា ឆ្នាំ 2022។

ទោះ​ជា​យ៉ាង​ណា អ្វីៗ​គ្រប់​យ៉ាង​វា​ហាក់​ដូចជា​បង្ហាញ​ថា ពេលវេលា​របស់​ Marcelo ជាមួយ Real Madrid បាន​បញ្ចប់​ហើយ ដោយ​រង់ចាំ​មើល​អ្វី​ដែល​នឹង​កើត​ឡើង​បន្ទាប់​ពី​ការ​ប្រកួត​វគ្គផ្តាច់ព្រ័ត្រ Champions League នៅថ្ងៃទី 28 ខែឧសភា ចុងខែ​នេះ។

ជិត​ឈាម​ដល់​វ័យ 34 ឆ្នាំ ខ្សែការពារ Marcelo នៅតែ​មាន​អារម្មណ៍​ថា ចង់​លេង​ឲ្យ​ក្លឹប​ស្ដេចស Real Madrid បន្ត​ទៀត ទោះ​បី​ជា​គាត់​ភាគ​ច្រើន​ត្រូវ​បាន​គ្រូ​បង្វឹក​ដាក់​នៅ​កៅ​អី​បម្រុង​ក៏ដោយ។ Marcelo បានចូល​រួម​ជាមួយ Real Madrid នៅ​ឆ្នាំ 2007 ដោយ​ពេល​នោះ​គាត់​មាន​​អាយុ​ត្រឹម​តែ 18 ឆ្នាំ​ប៉ុណ្ណោះ។ គាត់​បាន​ក្លាយជា​កីឡាករ​ដែល​ឈ្នះពាន​ច្រើន​ជាង​គេ​បំផុត​ជាមួយ​ក្លឹប Real Madrid។

មក​ទល់​ពេល​នេះ Marcelo លេង​បាន 17 ប្រកួត​នៅ​រដូវកាល​នេះ ដែល​ប្រកួត​ទាំង​នោះ​ភាគ​ច្រើនគាត់​ចូល​លេង​នៅ​ចុង​ម៉ោង។ យ៉ាង​ណា​មិញ​បច្ចុប្បន្ន​នេះ ក្លឹប​មិន​មាន​ការ​ចរចា​ណា​មួយ​ជាមួយ​កីឡាករ​រូប​នេះ​ទេ។

ប្រធាន​ក្លឹប Real Madrid កំពុង​រង់ចាំ​រហូត​ដល់​បញ្ចប់​រដូវកាល ទើប​ធ្វើ​ការ​សម្រេច​ចិត្ត​ចុងក្រោយ ខណៈ​ដែល​ក្លឹបកំពុង​មាន​ចេតនា​បន្ត​កុងត្រា​ថ្មី​បន្ថែម​ទៀត​ជា​មួយ Luka Modric ដែល​ត្រៀម​នឹង​ផុត​កុងត្រា​ដូច Marcelo ដែរ។

ប្រភព: Marca