ការ​ប្រកួត​រវាង Luton Town និង Bournemouth ត្រូវ​បាន​ផ្អាក បន្ទាប់​ពី​មាន​កីឡាករ​ម្នាក់​គាំង​បេះដូង​ពេល​កំពុង​ប្រកួត

ការ​ប្រកួត​លីគ​រវាង​ក្លឹប Luton Town ជាមួយ Bournemouth កាល​ពី​ម្សិលមិញ​នេះ ត្រូវ​បាន​ផ្អាក​នៅ​ដើម​តង់ទី 2 បន្ទាប់​ពី​កីឡាករ Tom Lockyer បាន​ដួល​សន្លប់​នៅ​លើ​ទីលាន​ប្រកួត។ យោងតាម​ការ​បញ្ជាក់​បី Luton Town បាន​ឲ្យ​ដឹង​ថា Tom Lockyer ដែល​មាន​នាទី​ជា​កាពីតែន​ក្រុម​ដែរ​នោះ បាន​ទទួល​រង​នូវ​ការ​គាំង​បេះដូង។

យ៉ាង​ណា​មិញ ករណី​នៃ​ការ​គាំង​បេះ​ដូង​របស់ Tom Lockyer គឺ​ស្រដៀង​គ្នា​ទៅ​នឹង Christian Eriksen កាល​ពី​ប៉ុន្មាន​ឆ្នាំ​មុន​ដែរ ដែល​បាន​ដួល​ភ្លាមៗ​នៅ​លើ​ទីលាន​ដោយ​គ្មាន​មូលហេតុ។ ដោយ​ឡែក​ការ​ប្រកួត Premier League រវាង​ក្រុម​ទាំង 2 កាល​ពី​ម្សិលមិញ​នេះ ត្រូវ​បាន​ផ្អាក​ពាក់​កណ្ដាល​ទី ខណៈ​ដែល Luton Town និង Bournemouth រក​បាន​ម្នាក់​មួយ​គ្រាប់​ដូច​គ្នា។

របាយការណ៍​ចុង​ក្រោយ​ដែល​បាន​បញ្ជាក់​ពី​ក្លឹប Luton Town បាន​ឲ្យ​ដឹង​ថា ពេល​នេះ​ខ្សែការពារ Tom Lockyer បាន​រួច​ផុត​ពី​គ្រោះ​ថ្នាក់​ដែល​អាច​ប៉ះពាល់​ដល់​អាយុ​ជីវិត​ហើយ ហើយ​ក្រុម​គ្រូ​ពេទ្យ​របស់​ក្លឹប​កំពុង​ធ្វើ​ការ​ព្យាបាល​បន្ថែម និង​តាម​ដាន​សុខភាព​របស់​គាត់​បន្ត​ទៀត។

ប្រភព: Twitter Luton Town