Chiellini ប្រកាស​ចាកចេញ​ពី Juventus នៅ​ចុង​បញ្ចប់​នៃ​រដូវកាល​នេះ!!!

កាល​ពី​ម្សិល​មិញ​នេះ មាន​ពត៌មាន​ផ្លូវ​ការណ៍​មួយ​ពី​ខ្សែ​ការពារ​ចាស់​វស្សា គឺ​កីឡាករ Giorgio Chiellini ដោយ​គាត់​បាន​បញ្ជាក់​ថា គាត់​នឹង​ចាកចេញ​ពី​ក្លឹប​សេះ​បង្កង់ Juventus នៅ​ចុង​បញ្ចប់​នៃ​រដូវកាល​នេះ។

កីឡាករ​វ័យ 37 ឆ្នាំ​រូប​នេះ ស្ថិត​នៅ​ចំណាត់​ថ្នាក់​លេខ 3 ក្នុង​បញ្ជី​ឈ្មោះ​កីឡាករ​ដែល​បង្ហាញ​ខ្លួន​ឲ្យ​ក្លឹប Juventus ច្រើន​បំផុត តាម​ពីក្រោយ Alessandro Del Piero និង Gianluigi Buffon។

Giorgio Chiellini បាន​ធ្វើ​សេចក្តី​ប្រកាស​ជា​ផ្លូវការណ៍ បន្ទាប់​ពី​ក្រុម​របស់​គាត់​បាន​ចាញ់​ក្រុម Inter Milan 4-2 ក្នុង​ការ​ប្រកួត​វគ្គ​ផ្តាច់ព្រ័ត្រ Coppa Italia កាល​ពី​ថ្ងៃពុធ​សប្ដាហ៍​នេះ។

ខ្សែការពារ Giorgio Chiellini បាន​ប្រាប់ Sport Mediaset ថា “ខ្ញុំ​ផ្តល់​ឱកាស​ដល់​ក្មេងៗ​ជំនាន់​ក្រោយ ព្រោះ​ថា​នៅ​ឆ្នាំ​ក្រោយ​ខ្ញុំ​នឹង​មិន​នៅ​ទីនេះ​ទៀត​ទេ។ នៅ​ថ្ងៃច័ន្ទ ខ្ញុំ​នឹង​និយាយ​ពាក្យ​លា​ នៅ​កីឡដ្ឋាន​របស់​ខ្ញុំ ហើយ​ការ​ប្រកួត​ប៉ះ Fiorentina នឹង​ក្លាយ​ជា​ការ​ប្រកួត​ចុង​ក្រោយ​របស់​ខ្ញុំ។ ខ្ញុំ​និយាយ​ពាក្យ​លា ដោយ​ភាព​រីករាយ​ចំពោះ​ក្រុម​នេះ… Juventus នឹង​នៅ​ជាមួយ​ខ្ញុំ​ជា​និច្ច”។

គួរ​រំលឹក​ផង​ដែរ​ថា Chiellini បាន​ចូលរួម​ជាមួយ Juventus តាំង​ពីរ​ឆ្នាំ 2005 មក​ម្ល៉េះ ដោយ​ផ្ទេរ​មក​ពី Fiorentina។ គាត់ គឺ​ជាអតីត​កីឡាករ​យុវជន​របស់​ក្លឹប AS Livorno។ Chiellini ធ្លាប់​ឈ្នះ​ជើង​ឯក​លីក​ចំនួន 9 ដង និង​ពានរង្វាន់ Italian Cup ចំនួន 5 ដង ក្នុង​នាម​ជា​កីឡាករ​របស់​ក្លឹប Juventus។

ប្រភព: EPSN