ក្លឹប​បិសាចក្រហម​កំពុង​ចង់​បាន​កីឡាករ​ម្នាក់​របស់​អាហ្សង់ទីន ដែល​ត្រូវ​បាន​គេ​ស្គាល់​ថា ជា​ជំនាន់​ថ្មី​របស់ Lionel Messi

ខ្សែប្រយុទ្ធ​របស់​ក្លឹប Atletico Colon ដែល​បច្ចុប្បន្ន​មាន​វ័យ 19 ឆ្នាំ កំពុង​មាន​ទម្រង់​លេង​លេច​ធ្លោរ​យ៉ាង​ខ្លាំង ហើយ​កីឡាករ​រូប​នេះ ក៏​កំពុង​មាន​កេរ្តិ៍​ឈ្មោះ​ល្បី​ល្បាញ​បំផុត​នៅ​ក្នុង​ប្រទេស​របស់​ខ្លួន។

អ្នក​គាំទ្រ​តែងមាន​ការ​ព្រួយ​បារម្ភ​យ៉ាង​ខ្លាំង នៅ​ក្នុង​ប្រទេស​អាហ្សង់ទីន​ដែល​ថា នៅ​ពេល​ជំនាន់​មាស​របស់ Lionel Messi, Sergio Aguero, Angel Di Maria និង​មិត្តភ័ក្តិ​របស់​ពួកគេ​បាន​ចូល​និវត្តន៍ នោះ​ក្រុម​ជម្រើស​ជាតិ​អាហ្សង់ទីន​នឹង​ពិបាក​ក្នុង​ការ​រក​អ្នក​មក​ជំនួស​ពួក​គេ។

ការ​ព្រួយ​បារម្ភ​នេះ​ប្រហែល​ជា​មិន​ចាំ​បាច់​ទេ ព្រោះ​នៅ​ពេល​នេះ​កីឡាករ​ក្មេងៗ​ជា​ច្រើន​ដែល​កំពុង​បង្ហាញ​ពី​ទេព្យកោសល្យ ជា​ពិសេស​កីឡាករ​ដែល​លេង​នៅ​ក្នុង​ប្រទេស​អាហ្សង់ទីន​នេះ​ផ្ទាល់​តែ​ម្ដង​គឺ Facundo Farias ដែល​មាន​ទម្រង់​ល្អ​បំផុត សម​ជា​អ្នក​ស្នង​តំណែង​របស់ Lionel Messi។

លើស​ពី​នេះ​ទៅ​ទៀត អាហ្សង់ទីន​នៅ​តែ​មាន​កីឡាករ​ល្បីៗ​ដូចជា Lautaro Martinez, Leandro Paredes និង Rodrigo De Paul ដែល​សុទ្ធតែ​មាន​វ័យ​ត្រឹមតែ 27 ឆ្នាំ ហើយ​បច្ចុប្បន្ន​កំពុង​លេង​នៅ​តំបន់​អឺរ៉ុប ជា​មួយ​ក្លឹប​ធំៗ​ទៀត​ផង។ លើស​ពី​នេះ ផ្អែក​តាម​វ័យ​របស់​ពួក​គេ គឺ​អាច​មាន​អនាគត​វែង​ឆ្ងាយ​ទៀត​ជា​មួយ​ក្រុម​ជម្រើស​ជាតិ។

Farias ដែល​មាន​វ័យ​ទើប​តែ 19 ឆ្នាំ កំពុង​ត្រូវ​បាន​ក្លឹប Boca Juniors និង River ដណ្ដើម​គ្នា​ចង់​បាន។ សេចក្ដី​រាយការណ៍​ចុង​ក្រោយ​មួយ​ក៏​បាន​ឲ្យ​ដឹង​ដែរ​ថា ក្លឹប​បិសាចក្រហម Manchester United ក៏​កំពុង​ផ្សារ​ភ្ជាប់​ទំនាក់​ទំនង​នឹង​ការ​ផ្ទេរ​កីឡាករ​រូប​នេះ​ដែរ។

ខ្សែប្រយុទ្ធ​រូប​នេះ មាន​សមត្ថភាព​អាច​លេង​នៅ​កណ្តាល​ក៏​បាន រឺ​ស្លាប រឺ​ក្នុង​តំណែង​បម្រើ​ប្រយុទ្ធ​ក៏​បាន។ លើស​ពី​នេះ​ទៅ​ទៀត ការ​អភិវឌ្ឍ​ខ្លួន​របស់ Facundo Farias តែងតែ​ត្រូវ​បាន​កត់​សម្គាល់​ដោយ វីរបុរសប្រេស៊ីល Ronaldo ថែម​ទៀត​ផង។

នៅ​អាយុ 13 ឆ្នាំ Facundo Farias ​បាន​បាត់បង់ម្តាយ​របស់​គាត់​ដោយ​ជម្ងឺ​មហារីក។ ហើយ​ក្នុង​អំឡុង​ពេល​នៃ​ជំងឺ​រាតត្បាត​ចុងក្រោយ​នេះ ឪពុក​របស់​គាត់​បាន​ទទួលមរណភាព​ដោយ​សារ​ជម្ងឺ Covid-19 និង​ជម្ងឺ​​ក្រិនថ្លើម និង​ទុក​ឲ្យ​គាត់​មើល​ថែ​ប្អូនស្រី​អាយុ 12 ឆ្នាំ​តែ​ម្នាក់​ឯង។

ប្រភព: Goal