Fabregas ប្រកាស​​​ចាក​ចេញ​ពី Monaco នៅ​ចុង​បញ្ចប់​នៃ​រដូវកាល​នេះ

ខ្សែបម្រើ Cesc Fabregas បាន​មើល​ឃើញ​ថា រដូវកាល 2021-22 នេះ ជា​រដូវកាល​ដ៏​អាក្រក់​បំផុត​ក្នុង​ជីវិត​បាល់​ទាត់​របស់​គាត់ ដែល​ត្រូវ​បាន​បំផ្លាញ​ដោយ​សារ​របួស ខណៈ​ដែល​គាត់​បាន​ចូល​លេង​តែ​ពីរ​ប្រកួត​ប៉ុណ្ណោះ​នៅ​ក្របខណ្ឌ Ligue 1 រដូវកាល​នេះ។

Cesc Fabregas បាន​បញ្ជាក់​ថា គាត់​នឹង​មិន​ត្រឡប់​ទៅ Monaco វិញ​ទេ​នៅ​រដូវកាល​ក្រោយ។ ខ្សែ​បម្រើវ័យ 35 ឆ្នាំ​រូបនេះ​បាន​ស៊ូទ្រាំ​នឹង​រដូវកាល​ដ៏​ខកចិត្ត​មួយ​នៅ Ligue 1 ដោយ​សារ​ការ​រងរបួស​ជាបន្តបន្ទាប់ ធ្វើ​ឲ្យ​គាត់​នៅ​ក្រៅ​ទីលាន។

Fabregas បានប្រាប់ So Foot ថា “វា​មិន​ត្រឹមតែ​ជា​ឆ្នាំ​ដ៏​អាក្រក់​បំផុត​ក្នុង​អាជីព​របស់​ខ្ញុំ​ប៉ុណ្ណោះ​ទេ ប៉ុន្តែ​ជាឆ្នាំ​ដ៏​អាក្រក់​បំផុត​នៃ​ជីវិត​របស់​ខ្ញុំ​ផង​ដែរ ពី​ព្រោះ​នៅ​ពេល​ដែល​ខ្ញុំ​មិន​សប្បាយ​ចិត្ត​ជាមួយ​បាល់ទាត់ ខ្ញុំ​មិន​អាច​សប្បាយ​ចិត្ត​ក្នុង​ជីវិត​ខាងក្រៅ​នោះ​ទេ”។

ទោះ​បី​ជា​យ៉ាង​ណា​ក៏​ដោយ Fabregas ប្រហែល​ជា​មិន​ទាន់​បាន​ត្រៀម​ខ្លួន​សម្រាប់​ការ​ចូល​និវត្តន៍​ពី​បាល់​ទាត់​នោះ​ឡើយ ហើយ​គាត់​អាច​នឹង​ព្យាយាម​ស្វែងរក​ក្លឹប​ណា​មួយ​សម្រាប់​ការ​លេង​ជា​លើក​ចុងក្រោយ មុន​នឹង​បញ្ចប់​អាជីព។

គួរ​រំលឹក​ផង​ដែរ​ថា Cesc Fabregas គឺ​ជា​អតីត​​កីឡាករ​របស់​ក្លឹប Arsenal, Chelsea និង Barcelona ដែល​បាន​ផ្ទេរ​ទៅ​លេង​នៅ Monaco កាល​ពី​ដើម​ឆ្នាំ 2019។ Fabregas ក៏​ជា​មិត្ត​ដ៏​ជិតស្និត​របស់ Lionel Messi និង Luis Suarez ផង​ដែរ។

ប្រភព: Goal