Tottenham ត្រូវ​ការ​តែ​មួយ​ពិន្ទុ​ទៀត​ប៉ុណ្ណោះ ដើម្បី​មាន​កៅអី​លេង UCL ឆ្នាំ​ក្រោយ ហើយ Arsenal នឹង​អស់​ឱកាស

ក្រុម​មាន់​ខ្នាយ​មាស Tottenham Hotspur បាន​ឡើង​ទៅ​កាន់​កំពូល​តារាង Top 4 ជា​ថ្មី​ម្ដង​ទៀត បន្ទាប់​ពី​ពួក​គេ​បាន​ទទួល​ជ័យជម្នះ 1-0 ជា​មួយ​ក្រុម Burnley កាល​ពី​ថ្ងៃ​អាទិត្យ​កន្លង​ទៅ។

វា​ជា​រឿង​ដែល​នឹកស្មាន​មិន​ដល់​មួយ នៅ​ក្នុង​ការ​ប្រជែង​​យក​ចំណាត់​ថ្នាក់​លេខ 4 នៅ​ក្របខណ្ឌ Premier League ដោយ​ដំបូង​ឡើយ Arsenal មាន​អាទិភាព​ខ្ពស់​បំផុត ក្នុង​ការ​ដណ្ដើម​ឱកាស​ទៅ​លេង UEFA Champions League រដូវកាល​ក្រោយ។

ប៉ុន្តែ Arsenal បាន​ភ្លាត់​ចាញ់​ប្រកួត​ចុងក្រោយ​ទាំងពីរ​ប្រកួត ជា​មួយ​ក្លឹប Tottenham Hotspur និង​ចាញ់ Newcastle កាលពី​រំលង​អាធ្រាត​យប់​មិញ​នេះ​ក្នុង​លទ្ធផល 2 ទល់នឹង 0។ រវាង​ក្រុម​កាំភ្លើងធំ Arsenal និង Tottenham Hotspur នៅ​សល់​មួយ​ប្រកួត​ចុងក្រោយ​ដូច​គ្នា ដើម្បី​ប្រជែង​យក Top 4 សម្រាប់​កៅ​អីលេង UCL រដូវកាល​ក្រោយ។

ដោយ​ឡែក ប្រកួត​ចុងក្រោយ​នោះ Arsenal គឺ​មាន​សម្ពាធ​យ៉ាង​ខ្លាំង ព្រោះ​ប្រសិន​បើ​ករណី Tottenham Hotspur ចាញ់ ដូច្នេះ Arsenal ត្រូវ​តែ​ឈ្នះ​ដាច់​ខាត។ ប៉ុន្តែ​បើ​ករណី Tottenham Hotspur ស្មើ នោះ Arsenal ត្រូវ​ឈ្នះ​គូ​ប្រកួត ហើយ​រក​ឲ្យ​បាន​គ្រាប់​បាល់ 16 គ្រាប់។ ប៉ុន្តែ​បើ​ក្រុម​ទាំង​ពីរ​ឈ្នះ​ដូច​គ្នា នោះ Tottenham Hotspur គឺ​ជា​អ្នក​មាន​កៅអី​លេង UCL ឆ្នាំ​ក្រោយ។

យ៉ាង​ណា​មិញ ប្រកួត​ចុងក្រោយ​របស់​ក្រុម Tottenham Hotspur គឺ​ត្រូវ​ប៉ះ​ក្រុម​បាត​តារាង Norwich City ហើយ​ក្រុម​កាំភ្លើងធំ Arsenal ត្រូវ​ប៉ះ Everton។

ប្រភព: 90 Min