Arsenal ចង់​បាន​ខ្សែការពារ Federico Dimarco របស់ Inter Milan ប៉ុន្តែ​តម្លៃ​ផ្ទេរ​កំពុង​ក្លាយ​ជា​ឧបសគ្គ

ក្លឹប​កាំភ្លើងធំ Arsenal កំពុង​ចាប់​អារម្មណ៍​លើ​ខ្សែការពារ​ស្លាប Federico Dimarco របស់ Inter Milan ប៉ុន្តែ​ពួក​គេ​មិន​អាច​ផ្ដល់​តម្លៃ​ផ្ទេរ តាម​ដែល​ក្លឹប​អ៊ីតាលី​កំពុង​ទាមទារ​ចង់បាន​នោះ​ឡើយ នេះ​បើយោង​តាម​របាយការណ៍​ចុងក្រោយ​មួយ​បាន​ចុះ​ផ្សាយ។

ក្លឹប​កាំភ្លើងធំ​កំពុង​ព្យាយាម​ចង់​ពង្រឹង​ក្រុម​របស់​ពួកគេ​នៅ​យុទ្ធនា​ការ​ក្របខណ្ឌ​កំពូល​ក្នុង​ប្រទេស បូក​រួម​ជា​មួយ​នឹង​ការ​ប្រជែង​ពាន​ផ្សេងៗ​ផង​ដែរ សម្រាប់​រដូវកាល​ក្រោយ។ បញ្ហា​របួស​របស់ Kieran Tierney បាន​ធ្វើ​ឲ្យ​គាត់​អវត្តមាន​ពេញ​មួយ​រដូវកាល ខណៈ​ពេល​ដែល Nuno Tavares មិន​សូវ​បាន​បង្ហាញ​ខ្លួន​ជាប់លាប់​សម្រាប់​ក្រុម​នោះ​ឡើយ។ ដូច្នេះ​ហើយ​យោង​តាម​ការ​រាយការណ៍​ពី The Sun បាន​លើកឡើង​ថា Arsenal ចង់ផ្ទេរ Dimarco មក​លេង​នៅ​តំបន់​ការពារ​ឆ្វេង​របស់ Kieran Tierney។

យ៉ាង​ណា​មិញ កីឡាករ​វ័យ 24 ឆ្នាំ Federico Dimarco បាន​បង្ហាញ​ខ្លួន​ចំនួន 32 លើក​សម្រាប់​ក្រុម Inter Milan រដូវកាល​នេះ ខណៈ​ដែល​ក្រុម​របស់​គេ បាន​បញ្ចប់​យុទ្ធនាការ​ឆ្នាំ​នេះ ក្នុង​ចំណាត់​ថ្នាក់​លេខ 2 សម្រាប់​ក្របខ័ណ្ឌ Serie A។ Federico Dimarco មាន​គ្រាប់បាល់​ចំនួន 2 គ្រាប់ និង​បញ្ជូន​បាល់​ឲ្យ​មិត្តរួម​ក្រុម​ចំនួន 4 ដង​ផង​ដែរ។

ទោះ​ជា​យ៉ាង​ណា​ក៏​ដោយ ក្រុម​កាំភ្លើងធំ​ចង់​បាន​តម្លៃ​ផ្ទេរ​មិន​សូវ​ខ្ពស់ ដែល​ពួក​គេ​អាច​ទទួល​យក​បាន ខណៈ​ដែល​របាយការណ៍​មួយ​បាន​ប្រាប់ថា Inter Milan ចង់​បាន​តម្លៃ​ផ្ទេរ​លើស​ពី 20 លានផោន សម្រាប់​ខ្សែ​ការពារ​ឆ្វេង Federico Dimarco។

Arsenal ចង់​បាន​តម្លៃ​ផ្ទេរ​ទាប​ជាង​អ្វី​ដែល Inter Milan ចង់​បាន។ Arsenal ប្រហែល​ជា​ចង់​បែកចែក​ថវិកា​លើ​ការ​ផ្ទេរ​ផ្សេង​ទៀត ដោយ​​ពួក​គេ​ក៏​កំពុង​ព្យាយាម​ទាក់ទង​ចង់​បាន​កីឡាករ Gabriel Jesus របស់ Manchester City និង Youri Tielemans របស់ Leicester City ផងដែរ។

ប្រភព: Metro