រឿងរ៉ាវ​ប្លែកៗ​ទាំង 7 យ៉ាង ដែល​អ្នក​ទាំង​អស់​គ្នា​មិន​ធ្លាប់​ដឹង​ពី Marco Reus

Marco Reus គឺ​ជា​​កីឡាករ​បាល់ទាត់​អាជីព ដែល​គេ​ទទួល​ស្គាល់​ថា មាន​ភាព​​ប៉ិនប្រសប់ និង​ជំនាញ​បច្ចេកទេស​ខ្ពស់​នៅ​លើ​ទីលាន​ប្រកួត។ គាត់​កើត​នៅ​ថ្ងៃទី 31 ខែឧសភា ឆ្នាំ 1989 ក្នុង​ក្រុង Dortmund ប្រទេស​អាឡឺម៉ង់។ Marco Reus លេង​ជា​ខ្សែ​បម្រើ​ប្រយុទ្ធ រឺ​ជា​ខ្សែ​ប្រយុទ្ធ​ស្លាប។

យ៉ាងណា​មិញ Marco Reus ត្រូវ​បាន​គេ​ចាត់​ទុក​ជា​កីឡាករ​ឆ្នើម​មួយ​រូប​ដែល​មាន​ភាព​ស្មោះស្ម័គ្រ​ជា​មួយ​ក្លឹប Borussia Dortmund បំផុត។ ប៉ុន្តែ​កាល​ពី​ម្សិលមិញ គាត់​បាន​ប្រកាស​ថា នឹង​ចាកចេញ​ពី​ក្លឹប​បច្ចុប្បន្ន​មួយ​នេះ នៅ​ចុង​បញ្ចប់​នៃ​រដូវ​ឆាប់ៗ​ខាង​មុខ បន្ទាប់​ពី​ចំណាយ​ពេល 12 ឆ្នាំ​ជាមួយ Borussia Dortmund។ ដោយ​ឡែក​នៅ​ថ្ងៃ​នេះ​យើង​នឹង​ចោល​ភ្នែក​ក្រឡេក​មក​មើល​រឿង​រ៉ាវ​ប្លែកៗ​ទាំង 7 របស់ Marco Reus។

1. Marco Reus អាច​នឹង​ក្លាយ​ជា​អ្នក​បើក​យន្ត​ហោះ ប្រសិន​បើ​គាត់​មិន​លេង​បាល់ទាត់

Marco Reus មាន​អាជីព​បាល់ទាត់​ដ៏​ជោគជ័យ ប៉ុន្តែ​កីឡាករ​សញ្ជាតិ​អាឡឺម៉ង់​រូប​នេះ ធ្លាប់​បាន​សារភាព​ថា ប្រសិន​បើ​គាត់​ត្រូវ​បាន​គេ​បង្ខំ​ឲ្យ​ឈប់​លេង​បាល់ទាត់ នោះ​គាត់​នឹង​អាច​ក្លាយ​ជា​អ្នក​បើក​យន្តហោះ។ Marco Reus ធ្លាប់​បាន​ប្រាប់​និយាយ​កាល​ពី​ឆ្នាំ 2012 ថា៖ “ខ្ញុំ​ចាប់​អារម្មណ៍​នឹង​ការ​ហោះហើរ​តាំង​ពី​ក្មេង​មក​ម្ល៉េះ។ កាល​ពី​មុន​ខ្ញុំ​តែងតែ​ចង់​ក្លាយ​ជា​អ្នក​បើក​យន្តហោះ។ ខ្ញុំ​ចូល​ចិត្ត​ការ​ហោះហើរ​តាំង​ពី​ក្មេង រហូត​ដល់​សព្វ​ថ្ងៃ​នេះ”។

2. ភាព​ស្មោះត្រង់​ចំពោះ​ក្លឹប

កេរដំណែល​របស់ Marco Reus ដែល​លើស​ពី​សមិទ្ធិផល​ដែល​គាត់​បាន​សាង គឺ​ភាព​ស្មោះ​ត្រង់​ចំពោះ​ក្លឹប Dortmund ដោយ​នេះ​បាន​ក្លាយ​ជា​ទី​ពេញ​ចិត្ត​របស់​អ្នក​គាំទ្រ​ជា​ខ្លាំង។ ក្លឹប​ធំៗ​ជា​ច្រើន​បានចរចា​ដើម្បី​ចុះ​ហត្ថលេខា​លើ​ខ្សែបម្រើ​សញ្ជាតិ​អាឡឺម៉ង់​រូបនេះ ប៉ុន្តែ​គាត់​បាន​សម្រេច​ចិត្ត​នៅ​ជាមួយ Borussia Dortmund។

3. Marco Reus គឺ​ជា​អ្នកគាំទ្រ​តារា​ចម្រៀង Justin Bieber

នៅ​ក្នុង​បទ​សម្ភាសន៍​មួយ​ជាមួយ CQ កីឡាករ Mario Gotze ដែល​ជា​មិត្ត​ភក្ដិ​របស់​គាត់ បាន​បង្ហើប​ពី​អាថ៌​កំបាំង​មួយ​របស់ Marco Reus ថា គាត់​គឺ​ជា​អ្នកគាំទ្រ​ដ៏​ងប់ងល់​ម្នាក់​របស់ Justin Beiber ហើយ​តែង​តែ​ច្រៀង រឺ​ស្តាប់​បទ​ចម្រៀង​របស់​តារា​ល្បី​រូប​នោះ។

4. ភរិយា​របស់ Marco Reus គឺ​ជា​តារា​ម៉ូដែល​ដ៏​ល្បី

ភរិយា​របស់​ខ្សែប្រយុទ្ធ​រូប​នេះ មាន​ឈ្មោះ​ថា Scarlett គឺ​ជា​តារាម៉ូ​ដែល​អាជីព ជនជាតិ​អាឡឺម៉ង់ ហើយ​បាន​ធ្វើ​ការ​ឲ្យ​ក្រុមហ៊ុន​ធំៗ​ជាច្រើន រួមទាំង​ក្រុមហ៊ុន Hyundai, Volkswagen, Drykorn និង Modeca Brautmoden ផង​ដែរ។ នាង​មាន​ចំណង់​ចំណូល​ចិត្ត​ក្នុង​ការ​ជិះសេះ និង​មាន Youtube Channel ផ្ទាល់​ខ្លួន ដែល​បង្ហោះ​វីដេអូ​ហាត់​ប្រាណ និង Vlog ប្រចាំ​ថ្ងៃ។

5. Tomas Rosicky គឺ​ជា​និមិត្តិ​រូប (idol) របស់ Marco Reus

កីឡាករ​វ័យ 34 ឆ្នាំ​រូប​នេះ ជា​អ្នកគាំទ្រ និង​ចាត់​ទុក​អតីត​ខ្សែបម្រើ​ក្លឹប​កាំភ្លើងធំ Arsenal គឺ​កីឡាករ Tomas Rosicky ជា​និមិត្ត​រូប​របស់​ខ្លួន។ យ៉ាង​ណា Tomas Rosicky ក៏​ធ្លាប់​បាន​លេង​រយៈពេល 6 រដូវកាល​នៅ Borussia Dortmund ផង​ដែរ ចន្លោះ​ឆ្នាំ 2001 ដល់ 2006។

6. ស្រឡាញ់​ការ​សាក់

មិន​ខុស​ពី​តារា​បាល់ទាត់​ល្បីៗ​នៅ​ជុំវិញ​ពិភពលោក Marco Reus មាន​ស្នាម​សាក់ ស្ទើរ​តែ​ពេញ​ខ្លួន​ប្រាណ​របស់​គាត់ ដោយ​មាន​សរសេរ​ឈ្មោះ​កូនៗ​របស់​គាត់, ​ព្រះយេស៊ូវគ្រីស្ទ​, រូប​សត្វតោ និង​ផ្កា​ជា​ដើម។

7. Marco Reus ដាក់​ឈ្មោះ​តាម​វីរបុរស​បាល់ទាត់​ហូឡង់ Marco van Basten

ឪពុក​ម្តាយ​របស់ Marco Reus បាន​ដាក់​ឈ្មោះ​គាត់​តាម​កីឡាករ​បាល់ទាត់​ហូឡង់​ដ៏​ល្បី​គឺ Marco van Basten។ តាម​ពិត​ឪពុកម្តាយ​របស់​គាត់​បាន​ត្រៀម​ចង់​ដាក់​ឈ្មោះ​គាត់​ថា “Dennis” នៅ​ពេល​ដែល​ម្តាយ​របស់​គាត់​កំពុង​ពរពោះ ប៉ុន្តែ​បន្ទាប់​ពី​ Van Basten បាន​ស៊ុត​បញ្ចូលទី​ដ៏​អស្ចារ្យ ក្នុង​ការ​ប្រកួត​ទល់​នឹង​សហភាពសូវៀត នៃ​ការ​ប្រកួត​​វគ្គផ្តាច់ព្រ័ត្រ Euro ​ឆ្នាំ 1988 នៅ​ទីក្រុង Munich ពួកគេ​បាន​សម្រេច​ចិត្ត​ដាក់​ឈ្មោះ​គាត់​ថា Marco ជំនួស​វិញ។

ប្រភព: GOAL