បាល់ទាត់អន្តរជាតិ
Real Madrid ចាប់អារម្មណ៍លើខ្សែបម្រើតម្លៃ 60 លានផោន របស់ហង្សក្រហម Liverpool

ក្លឹបអធិរាជស Real Madrid ត្រូវបានគេរាយការណ៍ថា បានចាប់អារម្មណ៍លើខ្សែបម្រើ Alexis Mac Allister របស់ក្លឹបហង្សក្រហម Liverpool ដែលតម្លៃនៃការផ្ទេរកីឡាករឆ្នើមរូបនេះអាចនឹងមានចំនួនប្រហែល 70 លានអឺរ៉ូ (60 លានផោន) ផ្អែកតាមកុងត្រាបច្ចុប្បន្នរបស់គាត់នៅ Anfield។
យ៉ាងណាមិញ កីឡាករសញ្ជាតិអាហ្សង់ទីនរូបនេះ បានចូលរួមជាមួយ Liverpool ដោយផ្ទេរពី Brighton កាលពីរដូវក្តៅឆ្នាំមុន ហើយចាប់តាំងពីពេលនោះមក គាត់បានក្លាយជាកីឡាករដ៏សំខាន់ក្រោមការដឹកនាំរបស់លោក Jurgen Klopp។ គិតមកទល់នឹងពេលនេះ Mac Allister លេងបានប្រកួតសរុប 45 ប្រកួតហើយ ដោយស៊ុតបញ្ចូលទីបាន 6 គ្រាប់ និងបញ្ជូនបាល់ឲ្យមិត្តរួមក្រុមបានចំនួន 7 ដង។
យោងតាមរបាយការណ៍ចុងក្រោយមួយបានឲ្យដឹងថា Real Madrid ចង់នាំយក Mac Allister មកទឹកដីអេស្ប៉ាញ។ ការផ្ទេរខ្សែបម្រើរូបនេះ ត្រូវបានគេមើលឃើញថា ហាក់មិនទំនងខ្លាំងពេកទេនារដូវក្ដៅខាងមុខ ប៉ុន្តែ Real Madrid ពិតជាចង់បាន Mac Allister ពិសេសនៅឆ្នាំ 2025 ពេលដែលពួកគេបាត់បង់ខ្សែបម្រើចាស់វស្សា 2 រូបគឺ Toni Kroos និង Luka Modric។
ប្រភព: Sportsmole