Lucas Torreira ប្រាប់ Arsenal ឲ្យ​បញ្ជូន​គាត់​ត្រឡប់​ទៅ Fiorentina វិញ

ខ្សែ​បម្រើ Lucas Torreira បាន​ប្រាប់​ក្លឹប​កាំភ្លើងធំ Arsenal ថា គាត់​ចង់​ត្រឡប់​ទៅ​កាន់​ទឹកដី​នៃ​ប្រទេស​អ៊ីតាលី​ជា​មួយ​ក្លឹប Fiorentina វិញ​នៅ​រដូវក្តៅ​នេះ។

កីឡាករ​សញ្ជាតិ​អ៊ុយរូហ្គាយ​រូប​នេះ ទើបតែ​បាន​ចំណាយ​ពេល​ពេញ​មួយ​រដូវកាល ក្នុង​ការ​ខ្ចីជើង​នៅ Serie A ហើយ​បាន​បង្ហាញ​ខ្លួន​ជាកីឡាករ​សំខាន់​នៅ​តំបន់​បម្រើ​របស់ Fiorentina ដោយ​បាន​បង្ហាញ​ខ្លួន 31 ប្រកួត និង​ស៊ុត​បញ្ចូល​ទី​បាន 5 គ្រាប់។ ទោះ​ជា​យ៉ាង​ណា ពេល​នេះ​ការ​ខ្ចី​ជើង​ត្រូវ​បញ្ចប់ ហើយ​គាត់​នឹង​ក្លាយ​ជា​កីឡាករ​របស់​ក្រុម​កាំភ្លើងធំ Arsenal វិញ។

យ៉ាង​ណា​មិញ នៅ​ដើម​ខែ​នេះ ភ្នាក់ងារ​របស់​កីឡាករ Torreira គឺ​លោក Pablo Bentancur បាន​អះអាង​ថា ក្លឹប​កាំភ្លើងធំ Arsenal បាន​ច្រានចោល​សំណើរ​ទិញ​ផ្ដាច់​កុងត្រា​ពី Fiorentina សម្រាប់ Lucas Torreira ក្នុង​តម្លៃ 15 លានអឺរ៉ូ។

ទន្ទឹម​នឹង​នោះ​ដែរ Torreira បាន​បញ្ជាក់​យ៉ាង​ច្បាស់​ថា គាត់​ចង់​ឲ្យ​ក្លឹប Fiorentina ព្រមព្រៀង​ទិញ​ផ្ដាច់​កុងត្រា​គាត់​ពី Arsenal ។ Torreira បាន​ប្រាប់ FanPage ក្នុង​ប្រទេស​អ៊ីតាលី​ថា “បំណង​របស់​ខ្ញុំ គឺ​ចង់​នៅ Fiorentina។ ប៉ុន្តែ​វា​ចាំ​បាច់​ណាស់ សម្រាប់​ក្លឹប​ក្នុង​ការ​ស្វែងរក​ដំណោះស្រាយ​លើ​កិច្ចព្រមព្រៀង​ជាមួយ Arsenal។ ខ្ញុំ​ពិត​ជា​ល្អ​ប្រសើរ​នៅ Fiorentina។ ខ្ញុំ​សប្បាយ​ជាមួយ​ជីវិត​នៅ​អ៊ីតាលី។ វាជា​ឆ្នាំ​ដ៏​ពោរពេញ​ដោយ​សុទិដ្ឋិនិយម​មួយ បើ​ទោះ​បី​ជា​ពួក​យើង​មិន​បាន​ចូល​លេង Europa League ក៏​ដោយ”។

ប្រភព: Metro