បិសាចក្រហម ត្រៀម​ចុះ​ហត្ថលេខា​លើ​ខ្សែការពារ​វ័យ​ក្មេង​សញ្ជាតិ​អាហ្សង់ទីន ដើម្បី​មក​ជំនួស​កន្លែង​របស់ Varane

ក្លឹប​បិសាចក្រហម Manchester United ត្រូវ​បាន​គេ​រាយការណ៍​ថា នឹង​ប្រជែង​គ្នា​ជាមួយ​ក្លឹប​តោខៀវ Chelsea នៅ​រដូវក្ដៅ​ខាង​មុខ ដើម្បី​ព្យាយាម​ចុះ​ហត្ថលេខា​លើ​ខ្សែការពារ​ឆ្នើម​សញ្ជាតិ​អាហ្សង់ទីន Aaron Anselmino។ បិសាចក្រហម កំពុង​មើល​ឃើញ និង​ធ្វើ​ការ​រំពឹង​ទុកថា កីឡាករ​វ័យ 19 ឆ្នាំ​របស់​ក្លឹប Boca Juniors រូប​នេះ នឹង​ស្នង​តំណែង​ដ៏​សាកសម​បំផុត​នៅ​តំបន់​ការពារ​របស់ Raphael Varane ដែល​ចាកចេញ​ពី Old Trafford បន្ទាប់​ពី​ចប់​ការ​ប្រកួត FA Cup វគ្គផ្តាច់​ព្រ័ត្រ។

ទោះ​បី​ជា​មាន​ការ​បន្ត​កុងត្រា​ថ្មីពី Jonny Evans ក៏​ដោយ បិសាចក្រហម​នៅ​តែ​មិន​ទាន់​អាច​ដោះស្រាយ​បញ្ហា​នៅ​តំបន់​ការពារ​របស់​ខ្លួន​បាន​នៅ​ឡើយ​ទេ ខណៈ​ដែល​អនាគត​របស់ Harry Maguire ក៏​នៅ​តែ​មិន​ទាន់​ច្បាស់លាស់​ផង​ដែរ។ លើស​ពី​នេះ​ទៀត Lisandro Martinez ដែល​ជា​កីឡាករ​មាន​ទម្រង់​លេង​ល្អ តែងតែ​មាន​របួស​ជា​ញឹកញាប់ ដោយ​ជាក់​ស្ដែង​នៅ​រដូវកាល​នេះ​គេ​បាន​ចូល​លេង​ត្រឹម​តែ 11 ប្រកួត​ប៉ុណ្ណោះ​នៅ​ក្នុង​ក្របខណ្ឌ Premier League។

យោងតាម​សារ​ព័ត៌មាន​ពី​ប្រទេស​អាហ្សង់ទីន Planeta BJ បាន​ឲ្យ​ដឹង​ថា Man United បាន​តាមដាន​ពី​ទម្រង់​លេង​របស់ Aaron Anselmino តាំង​ពី​ខែ​មករា​មក​ម្ល៉េះ ប៉ុន្តែ​មក​ដល់​ឥឡូវ ក៏​មាន​ក្លឹប​តោខៀវ Chelsea ផង​ដែរ ដែល​ពេញ​ចិត្ត​នឹង​ខ្សែការពារ​វ័យ​ក្មេង​រូប​នេះ​ដូច​គ្នា។

សម្រាប់ Chelsea មិន​មែន​ជា​រឿង​ចម្លែក​ទេ ក្នុង​ការ​ដែល​ពួក​គេ​តែងតែ​ចង់​នាំ​យក​កីឡាករ​ដែល​មាន​ទេពកោសល្យ​មក​ពី​តំបន់​អាមេរិកឡាទីន ដោយ​កន្លង​មក​ពួក​គេ​ធ្លាប់​បាន​ចុះ​ហត្ថលេខា​លើ​កីឡាករ​តម្លៃ​ថ្លៃ​ចំនួន 2 រូប​មក​ហើយ ពី​តំបន់​នោះ​​គឺ៖ Enzo Fernandez និង Moises Caicedo។

ប្រភព: Sportsmole