គ្រូ​បង្វឹក​ក្រុម​ជម្រើស​ជាតិ​អេស្ប៉ាញ បង្ហើប​ឲ្យ​ដឹង​ពី​ពេល​វេលា​គេង​តិច​បំផុត​របស់​ខ្លួន ក្នុង​មួយ​ថ្ងៃ

គ្រូ​បង្វឹក​ក្រុម​ជម្រើស​ជាតិ​អេស្ប៉ាញ​លោក Luis de la Fuente ដែល​ដឹកនាំ​កូន​ក្រុម​ក្នុង​ព្រឹត្តិការណ៍​ធំៗ និង​ពិសេស​កំពុង​បំពេញ​កាតព្វ​កិច្ច​នៅ Euro 2024 មាន​ការ​ខិតខំ​ប្រឹងប្រែង​ដ៏​ហត់នឿយ ខណៈ​ដែល​គាត់​បាន​ឲ្យ​ដឹង​ថា ខ្លួន​គេង​ត្រឹម​តែ​ប៉ុន្មាន​ម៉ោង​ប៉ុណ្ណោះ​ក្នុង 1 ថ្ងៃ។

គ្រូ​បង្វឹក​ឆ្នើម​រូប​នេះ បាន​បង្ហាញ​ឲ្យ​មនុស្ស​គ្រប់​គ្នា​បាន​ដឹង​ពី​ការ​ប្រឹងប្រែង​ដ៏​ខ្លាំងក្លា​របស់​ខ្លួន​រហូត​មាន​ពេល​គេង​ត្រឹមតែ 4 ម៉ោង​ប៉ុណ្ណោះ។ លោក De la Fuente បាន​និយាយ​នៅ​ក្នុង​បទ​សម្ភាសន៍​ជាមួយ Cadena COPE ថា៖ “យើង​ធ្វើ​ការ​ពី​ម៉ោង 9 ព្រឹក​ដល់​ម៉ោង 4 ព្រឹក​វិញ។ ខ្ញុំ​គេង 4 ម៉ោង ក្នុង​មួយ​ថ្ងៃ ព្រោះ​មាន​ការងារ​ជា​ច្រើន”។

សូម​រំលឹក​ផង​ដែរ​ថា De la Fuente បាន​ដឹកនាំ​ក្រុម​បាល់ទាត់​ជម្រើស​ជាតិ​អេស្ប៉ាញ​របស់​គាត់​ឲ្យ​ឈាន​ដល់​វគ្គ​ពាក់​កណ្តាល​ផ្តាច់ព្រ័ត្រ​ហើយ នៃ​ការ​ប្រកួត​ជើង​ឯក​ទ្វីប​អឺរ៉ុប (Euro) ឆ្នាំ 2024 ដែល​ពួក​គេ​នឹង​ត្រូវ​ជួប​ជាមួយ​ប្រទេស​បារាំង នៅ​ថ្ងៃ​ពុធ ទី 10 ខែ​កក្កដា​នេះ។ អេស្ប៉ាញ ប្រកួត​ដោយ​មិន​ទាន់ចាញ់ រឺ​ស្មើ​ឡើយ តាំង​ពី​វគ្គ​ចែក​ពូល​រហូត​ដល់​វគ្គ​ពាក់​កណ្ដាល​ផ្ដាច់ព្រ័ត។

ប្រភព: Dailysports