Kylian Mbappe សាង​កំណត់ត្រា​ក្លាយ​ជា​កីឡាករ​ដែល​រត់​លឿន​ជាង​គេ​នៅ Euro 2024

ខ្សែប្រយុទ្ធ​របស់​ក្រុម​ជម្រើស​ជាតិ​បារាំង Kylian Mbappe គឺ​ជា​កីឡាករ​ដែល​មាន​កំណត់ត្រា​រត់​លឿន​បំផុត ក្នុង​ព្រឹត្តិការណ៍​នៃ​ការ​ប្រកួត Euro ឆ្នាំ 2024។ យ៉ាង​ណា កាល​ពី​រំលង​អាធ្រាត​យប់​មិញ ក្រុម​ជម្រើស​ជាតិ​របស់​គាត់​បាន​ធ្លាក់​ចេញ​ពី​ការ​ប្រកួត​ត្រឹម​វគ្គ​ពាក់​កណ្ដាល​ផ្ដាច់ព្រ័ត​ហើយ បន្ទាប់​ពី​ចាញ់​អេស្ប៉ាញ 2-1។

យោងតាម​ទិន្នន័យ​​ដែល​ផ្ដល់​ដោយ​មន្ត្រី​រៀប​ចំ​ការ​ប្រកួត Euro 2024 បាន​ឲ្យ​ដឹងថា Kylian Mbappe មាន​ល្បឿន​នៃ​ការ​រត់​រហូត​ដល់ 36.5 គីឡូម៉ែត្រ ក្នុង​មួយ​ម៉ោង ដែល​ជា​ល្បឿន​លើស​កីឡាករ​ផ្សេងៗ​ទាំង​អស់​នៅ​ក្នុង​ព្រឹត្តិការណ៍​នោះ។ ចំណាត់​ថ្នាក់​លេខ 2 បាន​ទៅ​លើ​កីឡាករ Ferran Torres របស់​អេស្ប៉ាញ ដែល​មាន​ល្បឿន​រត់ 36 គីឡូម៉ែត្រ​ក្នុង​មួយ​ម៉ោង ខណៈ​ខ្សែ​ប្រយុទ្ធ Benjamin Sesko របស់​ប្រទេស​ស្លូវេនី ទទួល​បាន​ចំណាត់​ថ្នាក់​លេខ 3 ជា​មួយ​នឹង​ការ​រត់ 35.9 គីឡូម៉ែត្រ ក្នុង​មួយ​ម៉ោង។

គួរ​រំលឹក​ផង​ដែរ​ថា ខ្សែ​ប្រយុទ្ធ​ឆ្នើម Kylian Mbappe បាន​បង្ហាញ​ខ្លួន​ចំនួន 4 ប្រកួត​នៅ Euro 2024 ដោយ​បាន​ស៊ុត​បញ្ចូលទី 1 គ្រាប់ និង​បញ្ជូន​បាល់​ឲ្យ​មិត្ត​រួម​ក្រុម​បាន​ម្ដង។ កីឡាករ​វ័យ 25 ឆ្នាំ​រូប​នេះ​ក៏​មាន​នាទី​ជា​កាពីតែន​ក្រុម​ជម្រើស​ជាតិ​ផង​ដែរ ប៉ុន្តែ​គាត់​ក៏​ទទួល​រង​ការ​រិះគន់​ពី​មួយ​ចំនួន​ពី​មជ្ឈដ្ឋាន​បាល់ទាត់​នៅ​ក្នុង​ប្រទេស​បារាំង​ដូចគ្នា។

ប្រភព: Telecomasia