អតីត​កីឡាករ​ឆ្នើម Wesley Sneijder កំពុង​ជាប់​ពាក់ព័ន្ធ​នឹង​ករណី​លាងលុយ​ខ្មៅ

អតីត​ខ្សែបម្រើ​ប្រយុទ្ធ​របស់​ក្រុម​ជម្រើស​ជាតិ​ហូឡង់ Wesley Sneijder កំពុង​ត្រូវ​បាន​សង្ស័យ​ថា​ជាប់​ពាក់ព័ន្ធ​ក្នុង​ការ​លាង​លុយ​កខ្វក់ ដែល​ជា​ឧក្រិដ្ឋកម្ម​ដ៏​ធំ​មួយ (នេះ​បើ​យោង​តាម​សេចក្ដី​រាយការណ៍​ដោយ RTL)។ យ៉ាង​ណា​មិញ យោងតាម​ប្រភព​ដដែល​នេះ​ដែរ​បាន​ឲ្យ​ដឹងថា Sneijder គឺ​ជា​ម្ចាស់​ភាគ​ហ៊ុន​នៃ​ក្រុម​ហ៊ុន​សំណង់​មួយ ដែល​បិទបាំង​អំពើ​ខុស​ច្បាប់​នៅ​ពី​ក្រោយ​នោះ។

តាម​ការ​ស្រាវជ្រាវ និង​ស៊ើបអង្កេត​បាន​ឲ្យ​ដឹង​ថា លុយ​រាប់​សិប​លាន​អឺរ៉ូ​អាច​ត្រូវ​ឆ្លង​កាត់​ក្រុម​ហ៊ុន​សំណង់​របស់ Sneijder ដោយ​មាន​ទំនាក់​ទំនង​ជា​មួយ​ក្រុម​ឧក្រិដ្ឋជន​អូស្ត្រាលី ដែល​ពាក់ព័ន្ធ​នឹង​ការ​ផលិត និង​លក់​គ្រឿង​ញៀន ក៏​ដូច​ជា​សារធាតុ​ខុស​ច្បាប់​នានា​ជា​ច្រើន​ទៀត។

យ៉ាង​ណា​អតីត​កីឡាករ​បាល់ទាត់​ឆ្នើម​រូបនេះ​បាន​និយាយ​ដោយ​បដិសេធ​ថា គាត់​មិន​បាន​ដឹង​ពី​ទំនាក់ទំនង​ណាមួយ​រវាង​ក្រុមហ៊ុន ដែល​គាត់​ជា​ម្ចាស់​ភាគហ៊ុន និង​បណ្តាញ​ឧក្រិដ្ឋកម្ម​នោះ​ទេ។ ប្រសិន​បើ​ក្រុម​ហ៊ុន​សំណង់​ដែល​មាន​ការ​វិនិយោគ​ពី Sneijder ពិត​ជា​ស្ថិត​ក្នុង​ចំណុច​កណ្ដាល​នៃ​ការ​លាង​លុយ​កខ្វក់​ពិត​មែន នោះ​ប្រាក់​ដែលគាត់​វិនិយោគ​ទាំង​ប៉ុន្មាន​នឹង​ត្រូវ​បាត់បង់​ទាំង​ស្រុង។

ប្រភព: Telecomasia