កីឡាករ​ក្នុង​ក្រុម​ជម្រើស​ជាតិ​អង់គ្លេស មិន​ចូល​ចិត្ត Bellingham និង​ចាត់​ទុក​ថា ខ្សែបម្រើ​រូប​នេះ​មាន​ចរិក​តួឯក

កាល​ពី​ម្សិលមិញ ក្រុម​បាល់ទាត់​នៃ​ប្រទេស​អង់គ្លេស​បាន​ចាញ់​ក្នុង​ការ​ប្រកួត​វគ្គ​ផ្តាច់ព្រ័ត្រ​ក្រោម​ស្នាដៃ​របស់​​អេស្ប៉ាញ នៃ​ពាន​រង្វាន់ Euro 2024 ដែល​នេះ​ជា​ការ​បរាជ័យ 2 ដង​ជាប់ៗ​គ្នា​ផង​ដែរ។ ភ្លាមៗ​បន្ទាប់​ពី​នោះ​មក ប្រព័ន្ធ​ផ្សព្វផ្សាយ​របស់​អង់គ្លេស បាន​ចាប់ផ្តើម​សិក្សា​ដោយ​ស៊ើប​អង្កេត​មូលហេតុ​នៅ​ពី​ក្រោយ​ការ​បរាជ័យ​របស់​ក្រុម​លោក Gareth Southgate។

គេ​បាន​កំណត់​គោលចំបង​នៃ​បញ្ហា​ឃើញ​ថា បរិយាកាស​នៅ​ក្រុម​ក្រុម​ជម្រើស​ជាតិ​អង់គ្លេស មិន​មាន​ភាព​ល្អ​ប្រសើរ​ឡើយ ដោយ​មិន​មាន​ការ​សាមគ្គីភាព​រវាង​កីឡាករ និង​កីឡាករ។ យោងតាម​ប្រភព​ពី ​​The Athletic បាន​ឲ្យ​ដឹង​ថា ដើម​ហេតុ​ចំបង​នៃ​ភាព​មិន​ចុះ​សម្រុង​គ្នា​របស់​អង់គ្លេស​គឺ​ដោយ​សារ Jude Bellingham។

កីឡាករ​អង់គ្លេស​ជា​ច្រើន​ត្រូវ​បាន​គេ​ដឹង​ថា មិន​សប្បាយ​ចិត្ត​ជាមួយ​នឹង​​អ្នក​សារ​ព័ត៌មាន ដែល​តែងតែ​ចុះ​ផ្សាយ​លើក​តម្កើង Jude Bellingham តាំង​ពី​ចាប់​ផ្ដើម​ការ​ប្រកួត Euro មក​ម្ល៉េះ ខ្សែបម្រើ​រូប​នេះ​ត្រូវ​បាន​គេ​បង្ហាញ​ពី​ភាព​អស្ចារ្យ​ដែល​ដូចជា​វីរបុរស និង​ជា​កីឡាករ​ឆ្នើម​ជាង​គេ​នៅ​ក្នុង​ក្រុម ហើយ​ធ្វើ​ឲ្យ​អ្នក​ដទៃ​មិន​ពេញ​ចិត្ត​ឡើយ។

ជា​លទ្ធផល Bellingham មាន​មិត្ត​ជិតស្និទ្ធ​តែ​ម្នាក់​គត់​នៅ​ក្នុង​ក្រុម​ជម្រើស​ជាតិ​គឺ Trent Alexander-Arnold ខណៈ​ដែល​ទំនាក់​ទំនង​របស់​គាត់​ជាមួយ​មិត្ត​រួម​ក្រុម​ផ្សេង​ទៀត មិន​មាន​ភាព​ល្អ​ប្រសើរ​នោះ​ទេ។ គេ​ក៏​កត់​សម្គាល់​ឃើញ​ផង​ដែរ​ថា Bellingham ក៏​ធ្លាប់​ជួប​នឹង​បញ្ហា​ស្រដៀង​គ្នា​នេះ​ដែរ ក្នុង​អំឡុង​ពេល​ប៉ុន្មាន​ខែ​ចុងក្រោយ​របស់​គាត់​មុន​ចាកចេញ​ពី Borussia Dortmund។

ប្រភព: Dailysports