Liverpool ដាក់​សំណើរ​ផ្ទេរ​ខ្សែបម្រើ​វ័យ​ក្មេង​របស់​ក្លឹប Genoa

ក្លឹប​ហង្សក្រហម Liverpool ត្រូវ​បាន​គេ​រាយការណ៍​ថា បាន​ដាក់​សំណើរ​ដើម្បី​ចុះ​ហត្ថលេខា​លើ​ខ្សែ​បម្រើ​កណ្តាល​សញ្ជាតិ​ដាណឺម៉ាក​វ័យ 23 ឆ្នាំ Morten Frendrup ពី​ក្លឹប Genoa របស់ Serie A។ យ៉ាង​ណា​មិញ​នៅ​រដូវកាល​ក្រោយ គឺ​ជា​ការ​ចាប់​ផ្ដើម​យុគ​សម័យ​របស់​លោក Arne Slot ហើយ​ជា​ការ​ពិត ហង្សក្រហម​កំពុង​ព្យាយាម​រុះរើ​កីឡាករ​ឡើង​វិញ ដើម្បី​ត្រៀម​ប្រយុទ្ធ​នា​ពេល​ឆាប់ៗ​ខាង​មុខ។

មាន​កីឡាករ​ជា​ច្រើន​ដែល​ស្ថិត​នៅ​ក្នុង​រ៉ាដា​របស់ Liverpool តែ​ពួក​គេ​មិន​ទាន់​ចុះ​ហត្ថលេខា​បាន​នៅ​ឡើយ។ មួយ​ក្នុង​ចំណោម​កីឡាករ​ដែល​ស្ថិត​ក្នុង​ការ​ពេញ​ចិត្ត​របស់ Liverpool គឺ​ខ្សែបម្រើ Morten Frendrup ដែល​ជា​កីឡាករ​ឡើង​ជើង​ខ្លាំង ចាប់​តាំង​ពី​បាន​ចូលរួម​ជាមួយ​ក្លឹប Genoa ក្នុង​ខែ​មករា ឆ្នាំ 2022 មក។

Morten Frendrup បាន​ក្លាយ​ជា​កីឡាករ​ដ៏​សំខាន់​សម្រាប់ Genoa ក្នុង​រយៈពេល 2 ឆ្នាំ​កន្លះ​កន្លង​មក​នេះ។ ដោយ​ឡែក​យោងតាម​កាសែត​អ៊ីតាលី Tutto Mercato Web បាន​ឲ្យ​ដឹង​ថា ក្លឹប​ហង្សក្រហម Liverpool កំពុង​មាន​ភាគរយ​ខ្ពស់ ក្នុង​ការ​ចុះ​ហត្ថលេខា​បាន​សម្រេច​លើ​កីឡាករ​ឆ្នើម Morten Frendrup ខណៈ​ដែល​ពួក​គេ​បាន​ដាក់​សំណើរ​ជា​លើក​ដំបូង​នៅ​ក្នុង​ទំហំ​ទឹកប្រាក់​ចំនួន 21 លានផោន ដើម្បី​នាំ​យក​គាត់​មក Anfield នៅ​រដូវក្តៅ​នេះ។

កន្លង​មក​គ្រូ​បង្វឹក​របស់​ក្លឹប Genoa លោក Alberto Gilardino ធ្លាប់​បាន​និយាយ​ថា Frendrup គឺ​ជា​កីឡាករ​ដ៏​សំខាន់​របស់​ក្រុម និង​ជា​កីឡាករ​ដែល​មិន​អាច​លក់​បាន​ដាច់​ខាង​នៅ​រដូវ​ក្តៅ​នេះ។ ទោះ​ជា​យ៉ាង​ណា​ក្លឹប ក៏​មិន​ទាន់​បាន​បដិសេធ​មិន​ទទួល​យក​សំណើរ​របស់ Liverpool ដែរ ដោយ​ពេល​នេះ​ពួក​គេ​កំពុង​ពិចារណា​នៅ​ឡើយ។

ប្រភព: Sportsmole