ហង្សក្រហម​កំពុង​ទទួល​បាន​ឱកាស​ចុះ​ហត្ថលេខា​លើ Chiesa

ក្លឹប​ហង្សក្រហម Liverpool ត្រូវ​គេ​ដឹង​ថា កំពុង​ទទួល​បាន​ឱកាស​ដ៏​សំខាន់​មួយ ដើម្បី​អាច​ចុះ​ហត្ថលេខា​លើ​ខ្សែប្រយុទ្ធ​ស្លាប Federico Chiesa ខណៈ​ដែល​គ្រូ​បង្វឹក​ថ្មី​របស់ Juventus លោក Thiago Motta បាន​បង្ហាញ​ថា កីឡាករ​សញ្ជាតិ​អ៊ីតាលី​រូបនេះ​មិន​ស្ថិត​ក្នុង​ផែនការ​ប្រើប្រាស់​របស់​គាត់​នៅ​រដូវកាល​ថ្មី​ខាង​មុខ​នេះ​ឡើយ។

យ៉ាង​ណា​មិញ Chiesa គឺ​ជា​កីឡាករ​ដែល​មាន​ទម្រង់​លេង​ដ៏​ល្អ​មួយ​រូប និង​តែងតែ​បង្ហាញ​ខ្លួន​សម្រាប់​​ក្រុម​ជម្រើស​ជាតិ​អ៊ីតាលី​តាំង​ពី​ពេល​ដែល​គាត់​នៅ​ជា​កីឡាករ​របស់​ក្លឹប Fiorentina មក​ម្ល៉េះ។ ដោយ​ឡែក កាល​ពី​រដូវកាល​មុន​គាត់​ស៊ុត​បញ្ចូលទី​បាន 10 គ្រាប់សម្រាប់ Juventus ប៉ុន្តែ​ក្រោយ​ការ​​បណ្តេញ​លោក Massimiliano Allegri ចេញ​ពី​តំណែង​ជា​គ្រូ​បង្វឹក បាន​ធ្វើ​ឲ្យ​អនាគត​របស់​កីឡាករ​វ័យ 26 ឆ្នាំ​រូប​នេះ​ស្ថិត​ក្នុង​ភាព​មិន​ច្បាស់​លាស់។

បើ​យើង​ចោល​ភ្នែក​ក្រឡែក​ទៅ​មើល​អតីត​កាល​ឆ្នាំ 2021 ពេល​នោះ Liverpool ពិត​ជា​អន្ទះសារ​យ៉ាង​ខ្លាំង​ក្នុង​ការ​ចុះ​ហត្ថលេខា​លើ Federico Chiesa ជា​ពិសេស​បន្ទាប់​ពី​កីឡាករ​ឆ្នើម​រូប​នេះ​បាន​ឈ្នះពាន Euro 2020 ជាមួយ​ក្រុម​ជម្រើស​ជាតិ​អ៊ីតាលី។ ក្នុង​អំឡុង​ឆ្នាំ​នោះ Liverpool បាន​ដាក់​សំណើរ 85 លានផោន ប៉ុន្តែ Juventus បាន​បដិសេធ​សំណើរ​នោះ​ភ្លាមៗ ដោយ​ពួកគេ​បាន​អះអាង​ថា Chiesa គឺ​ជា​កីឡាករ​ដែល​មិន​អាច​លក់​បាន​ដាច់​ខាត។

យ៉ាង​ណា​ពេល​នេះ​អ្វីៗ​បាន​ផ្លាស់​ប្ដូរ ហើយ Federico Chiesa ហាក់​ដូច​ជា​កីឡាករ​ដែល​លែង​សូវ​មាន​តម្លៃ​សម្រាប់ Juventus ហើយ។ ប្រសិន​បើ​ហង្សក្រហម​នៅ​តែ​ចង់​បាន Federico Chiesa នោះ​ពួក​គេ​នឹង​អាច​សម្រេច​វា​បាន​នៅ​រដូវក្ដៅ​នេះ ហើយ​ក៏​មិន​ចាំ​បាច់​ចំណាយ​ប្រាក់​ច្រើន​ខ្ទង​រាប់​សិប​លាន​ផោន​ដូច​កាល​ពី​មុន​នោះ​ឡើយ។

ប្រភព: Khelnow