បិសាចក្រហម​រក​មិន​ឃើញ​ខ្សែបម្រើ​ដែល​ល្អ​ជាង Amrabat និង​កំពុង​ចង់​យក​កីឡាករ​រូប​នេះ​មក​វិញ

ការផ្ទេរ​ខ្សែបម្រើ​កណ្ដាល​ចំណូល​ថ្មី នៅ​តែ​ជាអាទិភាព​សំខាន់ និង​ដំបូង​បង្អស់​សម្រាប់​ក្លឹប​បិសាចក្រហម Manchester United ក្នុង​ទីផ្សារ​ដោះដូរ​កីឡាករ​នា​រដូវក្តៅ​នេះ។ កន្លង​មក​ក្រុម​របស់​លោក Erik ten Hag ត្រូវ​បាន​ផ្សារ​ភ្ជាប់​យ៉ាង​ខ្លាំង​ជាមួយ​នឹង​ខ្សែ​បម្រើ​មួយ​ចំនួន​ដូច​ជា៖ Manuel Ugarte, Adrien Rabiot និង Edson Alvarez ជា​ដើម។

ទោះ​ជា​យ៉ាង​ណា​ក៏​ដោយ លទ្ធភាព​នៃ​ការ​ចុះ​ហត្ថលេខា​លើ​ខ្សែបម្រើ​ឆ្នើមៗ​ទាំង​នោះ ប្រហែល​ជា​មិន​អាច​ទៅ​រួច ហើយ​បិសាចក្រហម​បាន​ព្យាយាម​ស្វែងរក​បេក្ខភាព​ផ្សេង​បន្ត​ទៀត។ ដោយ​ឡែក គ្មាន​ខ្សែ​បម្រើ​កណ្ដាល​ណា​មួយ​ដែល​សាកសម ហើយ​អាច​សម្រប​តាម​ទម្រង់​លេង​របស់​បិសាចក្រហម​នោះ​ឡើយ។

ជា​លទ្ធផល Man United ចង់​ចុះ​ហត្ថលេខា​លើ​ខ្សែ​បម្រើ​ម្នាក់​ដែល​ធ្លាប់​ដឹង​ច្បាស់​ពី​ទម្រង់​លេង​របស់​ពួក​គេ ដោយ​នេះ​សំដៅ​ទៅ​លើ Sofyan Amrabat។ កីឡាករ​រូប​នេះ​បាន​ចំណាយ​ពេល​ពេញ​មួយ​រដូវកាល​មុន​ក្នុង​ការ​ខ្ចី​ជើង​នៅ Manchester United ដោយ​ផ្ទេរ​ពី Fiorentina។

Erik ten Hag ពេញ​ចិត្ត​នឹង​កម្រិត​នៃ​ការ​បង្ហាញ​សមត្ថភាព​របស់​កីឡាករ​សញ្ជាតិ​ម៉ារ៉ុក​រូប​នេះ ហើយ​ចង់​ជួប​គ្នា​ជាមួយ​គាត់​ម្តង​ទៀត។ បច្ចុប្បន្ន​ក្លឹប​បិសាចក្រហម កំពុង​ស្វែង​រក​វិធី​សាស្ត្រ​ដ៏ល្អ​មួយ​សម្រាប់​ការ​ផ្ទេរ Sofyan Amrabat ខណៈ​ដែល​គេ​ក៏​ចាប់​អារម្មណ៍​ចង់​លេង​ឲ្យ​បិសាចក្រហម​ជា​ថ្មី​ម្ដង​ទៀត​ដែរ។

ប្រភព: Dailysports