Marc Guiu ប្រាប់​មូលហេតុ​ដែល​ខ្លួន​សម្រេច​ចិត្ត​ចាកចេញ​ពី Barcelona ទៅ​ចូលរួម​ជាមួយ Chelsea

កីឡាករ​ឆ្នើម​វ័យ 18 ឆ្នាំ Marc Guiu បាន​ចាកចេញ​ពី​ក្លឹប Barcelona ទៅ​កាន់​តោខៀវ Chelsea កាល​ពី​ពេល​ថ្មីៗ​កន្លង​ទៅ។ ខ្សែ​ប្រយុទ្ធ​រូប​នេះ ត្រូវ​បាន Barcelona ប្រូម៉ូត​ឡើង​មក​លេង​ជាមួយ​ឈុត​ធំ​រួច​ហើយ និង​ធ្លាប់​បាន​បង្ហាញ​ខ្លួន​ជា​មួយ​ក្រុម​កាល​ពី​រដូវកាល​មុន​ផង​ដែរ តែ​ទោះ​បី​ជា​បែប​នេះ​ក៏​ដោយ គាត់​នៅ​តែ​សម្រេច​ចិត្ត​ចាកចេញ​ពី​ទឹកដី​អេស្ប៉ាញ។

Marc Guiu ត្រូវ​បាន​គេ​មើល​ឃើញ​ថា នឹង​ក្លាយ​ជា​អនាគត​នៃ​ខ្សែ​ប្រយុទ្ធ​ដ៏​លេច​ធ្លោរ​ខ្លាំង​មួយ​រូប។ ទោះ​ជា​យ៉ាង​ណា​ក៏​ដោយ កីឡាករ​ឆ្នើម​រូប​នេះ​បាន​ចូលរួម​ជាមួយ​ក្លឹប​តោខៀវ ជាមួយ​នឹង​លក្ខខណ្ឌ​ផ្ទេរ​ក្នុង​តម្លៃ​ត្រឹមតែ 5 លានផោន​ប៉ុណ្ណោះ ហើយ​គាត់​បាន​ចុះ​កុងត្រា​ជាមួយ​ក្លឹប​ថ្មី Chelsea ដែល​មាន​សុពលភាព​ដល់​ឆ្នាំ 2029។

ការ​ផ្លាស់​ប្ដូរ​ក្លឹប​នៅ​ក្នុង​ដំណាក់​កាល​នេះ គឺ​ជា​ផ្លាស់​ប្ដូរ​ដ៏​ធំ​មួយ​សម្រាប់​កីឡាករ​វ័យ​ក្មេង​ដូច​ជា Marc Guiu ហើយ​ជា​ពិសេសេ​គាត់​បាន​ចាកចេញ​ពី​ប្រទេស​កំណើត​របស់​ខ្លួន​ថែម​ទៀត​ផង។ ទោះ​ជា​យ៉ាង Marc Guiu គិត​ថា ការ​សម្រេច​ចិត្ត​របស់​គាត់​គឺ​ត្រឹមត្រូវ។

ថ្មីៗ​នេះ Marc Guiu បាន​និយាយ​ថា៖ “ខ្ញុំ​តែងតែ​មាន​ក្ដី​សុបិន​ចង់​លេង​នៅ Premier League ហើយ Chelsea គឺ​ជា​ក្លឹប​ដ៏​អស្ចារ្យ​មួយ​ដែល​មាន​ប្រវត្តិ​សាស្ត្រពី​យូរ​ណាល់​មក​ហើយ។ វា​​ជា​ការ​សម្រេច​ចិត្ត​ដ៏​លំបាក ប៉ុន្តែ​វា​ជា​ឱកាស​ដ៏​ពិសេស ដូច្នេះ​ខ្ញុំ​ត្រូវ​តែ​ចាប់​យក​​វា”។

ប្រភព: Metro